Dous anos de prisión por abusar sexualmente "case a diario" dunha menor coa que conviviu 9 anos, pero non entrará no cárcere

Un home acusado dun delito continuado de abuso sexual a unha menor, Jesús P.M., aceptou este luns a pena de 2 anos de cárcere, nunha vista de conformidade celebrada na sección quinta da Audiencia Provincial de Pontevedra, con sede en Vigo. Os feitos tiveron lugar entre 1998 e 2007, en varios domicilios da provincia de Pontevedra nos que o acusado e a menor conviviron. Uns feitos que, segundo a Fiscalía, sucedéronse "de forma reiterada, continuada e case diaria".

Na vista celebrada este luns, o procesado admitiu a acusación e, en base a un acordo das partes, aceptou a pena de dous anos de cárcere, coa aplicación das atenuantes de confesión, dilacións indebidas e reparación do dano (xa pagou a indemnización á vítima). Ademais da pena de prisión, foi inhabilitado durante 4 anos para exercer profesión ou actividade que implique contacto con menores; e non poderá comunicarse nin achegarse a menos de 500 metros da vítima por un tempo de 3 anos. Igualmente, estableceuse unha indemnización de 60.000 euros, dos que unha parte xa foron consignados antes do xuízo, e o resto foi entregado nesta mesma xornada. As partes acordaron a suspensión da execución da pena durante un período de 2 anos e medio, coa condición de que, nese tempo, o procesado non delinca.

Xuízo de conformidade a Jesús P.M., que admitiu un delito continuado de abusos a unha menor, e que aceptou 2 anos de prisión e pagar unha indemnización de 60.000 euros | Fonte: Europa Press