Unha investigadora galega descobre catro novas especies de crustáceos en Mauritania

Investigadores da Universidade de Vigo e do Instituto Español de Oceanografía (IEO) veñen de presentar o traballo máis completo realizado ata a data sobre a biodiversidade dos crustáceos profundos de Mauritania. Grazas á mostraxe desenvolvida durante catro campañas oceanográficas, os científicos puideron identificar, no últimos catro anos, 132 especies de crustáceos decápodos, das cales catro resultaron ser novas para a ciencia.

Entre os anos 2007 e 2010, o Instituto Español de Oceanografía (IEO) desenvolveu unha serie de catro campañas multidisciplinares en augas da Zona Económica Exclusiva de Mauritania, en cooperación co Institut Mauritanien de Recherches Océanographiques et deas Pêches (IMROP) e a Universidade de Vigo, entre cuxos obxectivos se atopaba o estudo dos invertebrados de fondo recollidos, tanto como fauna acompañante nas pescas de arrastre, como mediante aparellos específicos para a mostraxe do bentos (os organismos que viven asociados ao fondo), informa o IEO.

Paralelamente, en 2009, o IEO puxo en marcha un proxecto estrutural co fin de estudar a biodiversidade dos ecosistemas bentónicos, en base ás coleccións faunísticas e datos recolleitos nas súas campañas africanas (ECOAFRIK). Ao longo dos últimos anos vén desenvolvendo, no marco deste proxecto, un rigoroso estudo taxonómico e ecolóxico sobre os grupos máis representativos do bentos, que está a xerar importantes resultados faunísticos sobre unha das zonas máis descoñecidas dos océanos no mundo.

Tese doutoral

O pasado mes de xaneiro defendeuse na Universidade de Vigo unha tese doutoral sobre os crustáceos decápodos de augas profundas de Mauritania, que constitúe a primeira que se produce no marco do proxecto ECOAFRIK e que representa o traballo máis completo sobre a biodiversidade deste grupo en África noroccidental publicado ata a data.

Os decápodos constitúen o grupo de crustáceos de maior diversidade específica e maior dominancia na plataforma e noiro continental de África Noroccidental, incluíndo especies de gran importancia como recurso pesqueiro e de elevado valor económico. Este feito converteuno en obxecto de numerosos estudos, sendo o grupo de invertebrados mellor coñecido do oeste africano xa desde o século XIX, aporta o IEO.

A autora do traballo de doutoramento foi Susana S. de Matogueiras-Pita, quen dedicou catro anos ao estudo deste grupo e identificado un total de 132 especies de crustáceos decápodos, pertencentes a 49 familias, todas elas recollidas nas campañas Maurit. O maior esforzo dedicouno á revisión e estudo detallado dos grupos de decápodos cuxo coñecemento previo na área era aínda escaso e fragmentario, como quirostiloideos, galateoidos, paguroideos, talasinídeos e braquiuros.

Os resultados sobre estes grupos, entre eles a descrición de catro especies e un xénero novos para a ciencia, foran publicados previamente pola autora nas revistas Zootaxa e Marine Biodiversity. Ademais, neste traballo de tese se reasignan a outros xéneros tres especies, descríbense por primeira vez as femias de dúas, reescríbese unha especie de galateido, incluíndo un detallado estudo da súa variabilidade intraespecífica, achéganse novos datos sobre a morfoloxía de catro especies, cítanse por primeira vez desde a súa descrición orixinal outras catro e amplíase a distribución xeográfica de dezaoito. Como final, o traballo ofrece unha visión global das comunidades de decápodos dos fondos brandos do noiro de Mauritania.

Os traballos de doutoramento estiveron dirixidos por Ana Ramos, investigadora do Centro Oceanográfico de Vigo do IEO e coordinadora do proxecto, e polo profesor Fran Ramil, da Facultade de Ciencias do Mar da Universidade de Vigo e responsable do estudo taxonómico.