A Carballa da Rocha ou da Saínza, sete metros de perímetro e 30 de altura, terá un plan de xestión

A Carballa da Rocha, en Rairiz de Veiga, convértese no quinto monumento natural de Galicia en contar cun plan de xestión para garantir a súa preservación, que inclúe un programa de actuacións que prevé un investimento de preto de 350.000 euros na próxima década.

A Carballa da Rocha ou da Saínza presenta un porte magnífico. A súa medición oficial é de 6,90 metros de perímetro que deben tomarse a unha altura de 1,30 metros do chan. Máis arriba esgállase en dúas grandes pólas que superan os trinta metros de altura.

Ademais do seu interese botánico, á árbore da Saínza posúe un notable valor cultural. As súas raíces fúndense na historia de onde está plantada, nas proximidades da capela da Virxe da Mercé, e na memoria das xentes do lugar.

Cada 24 de setembro, co gallo das festas patronais, a sombra desta carballeira acolle tamén unha senlleira romaría, unha das poucas recreacións en Galicia das batallas entre mouros e cristiáns. O denominado “ataque” represéntase no Campo do Castelo e está declarado Festa de Interese Turístico.

VISITA

A conselleira de Medio Ambiente e Cambio Climático, Ángeles Vázquez, visitou este xoves o espazo protexido e detallou que o obxectivo do plan é compatibilizar a protección da súa contorna co seu uso público, identificar os valores a protexer, o seu estado de conservación actual e os posibles riscos que lle poidan afectar.

Así, o plan de xestión, que se publicará previsiblemente no Diario Oficial de Galicia (DOG) antes de finalizar o ano, establece os seus usos e as actividades permisibles nos ámbitos turísticos, investigador, educativo e de aproveitamento gandeiro e forestal.

Neste sentido, a conselleira remarcou que o plan recolle a compra de dous predios nos que crece a Carballa da Rocha. A previsión é adquirir no futuro máis de 6.200 metros cadrados co obxectivo de garantir a súa correcta conservación ao converterse no patrimonio público.