Abren en decembro novos centros de acollida para migrantes en Valga, Burela e Padrón, con 348 prazas en total

O Goberno abrirá na primeira quincena de decembro novos centros de acollida en Galicia para migrantes de cara a "atender a crise humanitaria", informa a Delegación do Goberno. Así, crearanse 173 prazas en Valga, 110 en Burela e 65 en Padrón. Ademais, "amplíanse as prazas existentes en Santiago e outros municipios do territorio".

O delegado do Goberno, Pedro Blanco, xa informou ao presidente da Xunta, Alfonso Rueda, e aos alcaldes e alcaldesas das localidades de acollida, avanza a Delegación do Goberno que sinala que a actuación se enmarca "dentro da cooperación, transparencia e diálogo" entre administracións.

Do programa, indica que é "o suficientemente flexible para reaccionar a repuntes de chegadas con prazas de emerxencia que se abren e pechan en función da necesidade". Ademais, sinala que estes aloxamentos "poden variar en función das necesidades e dos imprevistos que xurdan no desenvolvemento".

Refuxiados da guerra de Mali e migrantes á súa chegada ao Monte do Gozo | Fonte: César Argina - Arquivo