Volven os contrastes térmicos: case 30º no Levante e en Galicia entra unha fronte atlántica

Suba de temperaturas de ata 30º en Canarias e no levante español, mentres que Galicia estará afectada por unha fronte atlántica. O tempo esta fin de semana será de moito contraste na Península. 

Así, o oeste peninsular verase afectado por unha fronte atlántica que deixará intervalos de nubes medias e altas na metade occidental, e ceos nubrados ou cubertos con precipitacións ocasionalmente acompañadas de treboada en Galicia. Aquí poderían chegar a ser localmente fortes e/ou persistentes na súa fachada atlántica, e, á súa vez, tamén poderían acabar afectando a puntos de Asturias e oeste de Castela e León e de Estremadura.

A predición recolle que soprará vento de compoñente sur no Cantábrico e cuadrante noroeste, con probables intervalos de forte e refachos moi fortes en litorais atlánticos de Galicia.

E mentros os termómetros baixan en Galicia, subirán de forma case xeneralizada en case todo o Estado, máis acusadamente en interiores do leste e sueste peninsular, e poderanse superar os 30ºC en puntos das illas Canarias orientais, segundo a predición da Axencia Estatal de Meteoroloxía (AEMET). Isto é froito dunha situación anticiclónica que afecta ao leste de España.