Estréase Bibopalula, a primeira serie de debuxos en Galego
As máis e os máis pequenos xa teñen un contido inédito en Galicia para a súa aproximación ás pantallas. Trátase de Bibopalula, a primeira serie musical de debuxos en lingua galega, que veñen de estrear a produtora Undodez e a Televisión de Galicia a través de xabarin.gal e a aplicación móbil do Xabarín.
Por Galicia Confidencial | Santiago de Compostela | 29/11/2024 | Actualizada ás 20:15
Creada por Laura Mahía e Andrés Mahía, que son tamén directora e guionista da serie, conta con 55 capítulos de 5 minutos na súa primeira temporada, co paporrubio Robin, o merlo Merli, a pega Pegui e o peto Carpin como protagonistas. Os catro forman a Banda do Bosque, un grupo musical ao que se unen en cada episodio outros tantos paxaros, coas voces dalgunhas das actrices e actores máis coñecidos polo público en Galicia como Melania Cruz, Marta Lado, Iria Lamas, Marita Martínez ou Xosé A. Touriñán.
Os ciclos naturais do bosque, desde a chegada do inverno ata a das cegoñas, son tamén protagonistas dunha serie que ten na música un dos seus grandes valores: cada un dos episodios remata co videoclip dun tema musical orixinal, composto por Santi Jul e Iván Laxe.
Nunca antes o público infantil no tramo de idades de 3 a 6 anos contara cun contido musical na nosa lingua, feito integramente por profesionais e empresas galegas. Esta aposta de Undodez responde ao compromiso da produtora que lideran o actor Xosé A. Touriñán e os produtores Álvaro Pérez Becerra e Javi Lopa coa produción en galego e desde Galicia.
Bibopalula conta coa participación da Televisión de Galicia, e co apoio da Xunta de Galicia a través da Axencia Galega das Industrias Culturais. A canle pública autonómica estreará en exclusiva a serie a través da súa plataforma de contidos dixitais infantís, antes de que viaxe por outros territorios e noutras linguas a través de diferentes operadores.
A aplicación do Xabarín e xabarin.gal estreou este venres, 29 de novembro,os primeiros vinte episodios, e ao longo desa fin de semana Bibopalula contará cun stand no Culturgal, que se celebrará en Pontevedra, onde se dará a coñecer entre o público e terá lugar unha presentación aberta ás familias.
Ao longo do mes de decembro está prevista unha intensa campaña de promoción, que incluirá a publicación dun conto infantil, a aplicación móbil da serie, ou contidos complementarios a través de YouTube e as principais plataformas de música en streaming. A partir de xaneiro está prevista a publicación dunha unidade didáctica que recollerá contidos relacionados co coidado da natureza ou a música, que se completarán con visitas dos protagonistas a diferentes centros educativos.
Undodez xa traballa, da man da produtora de artes escénicas Ainé, na produción do espectáculo musical en vivo.
