Uns 24.000 nenos menores de 5 anos poderán vacinarse contra a gripe esta fin de semana en todos os hospitais galegos

Esta fin de semana serán vacinados fronte á gripe nos 14 hospitais de Galicia os menores de cinco anos que non fosen vacinados con anterioridade. Así, Sanidade enviará aos proxenitores un SMS informativo cun tramo de hora no que poden acudir a vacinar aos nenos. Segundo destacou o Goberno galego, trátase dunha medida máis para "facilitar a conciliación familiar á vez que se potencia a vacinación".

Deste xeito, os proxenitores que non poidan acudir pola semana ao centro de saúde terán como alternativa vacinar aos seus fillos a fin de semana. Nos sete hospitais principais, a vacinación terá lugar tanto o sábado como o domingo de 10.00 a 14.00 horas e de 16.00 a 20.00 horas. Nos sete hospitais comarcais, a vacinación será o sábado no mesmo horario. A convocatoria total no conxunto das catro provincias galegas abarca ao redor de 24.000 nenos e nenas.

IMPORTANCIA DA VACINACIÓN

A Consellería de Sanidade lembra a importancia da vacinación antigripal infantil para evitar complicacións graves derivadas da enfermidade. Nesta liña, explicou que a poboación infantil presenta un número moi elevado de infeccións por gripe, estimándose que en España son ata tres veces máis altas que nas persoas maiores de 65 anos e con taxas de hospitalización similares. Os datos da campaña de vacinación do pasado ano mostran que a vacinación antigripal en poboación infantil é efectiva para evitar ao redor do 70% das hospitalizacións causadas por esta infección nas nenas e nenos de Galicia.

Detalle da xiringa onde lle van a inxectar a vacina da gripe durante a vacinación a menores de 5 anos da gripe | Fonte: Joaquín Corchero