Os tres aeroportos galegos gañan pasaxeiros en novembro, un mes no que o de Santiago fai historia
O aeroporto compostelán creceu un 13 %, ata os 235.917 usuarios.
Por Europa Press / Redacción | VIGO | 12/12/2024 | Actualizada ás 15:15
Os tres aeroportos galegos rexistraron un incremento dos seus pasaxeiros o pasado novembro, en comparación co mesmo mes de 2023, situándose o de Santiago de Compostela á cabeza, que creceu un 13 %, ata 235.917 usuarios. Así se desprende das cifras publicadas este xoves por Aena, que explica que deste total de pasaxeiros en Lavacolla, 234.620 voaron en voos comerciais. "Trátase do mellor dato de tráfico de pasaxeiros rexistrado nun mes de novembro na historia do aeroporto", subliñou a compañía.
En canto ás operacións, o pasado mes o aeroporto compostelán rexistrou 1.835 voos (un 14,3% máis que en novembro de 2023), dos que 1.721 foron voos comerciais (1.503 a destinos nacionais e 218 a destinos internacionais). No que vai de ano, 3,4 millóns de pasaxeiros visitaron as instalacións de Santiago. A terminal de carga compostelá rexistrou un total de 426 toneladas de mercadorías, un 0,1 % menos que no mesmo mes do pasado ano.
Pola súa banda, o aeroporto de Vigo contabilizou 87.434 pasaxeiros en novembro, un 10,6 % máis, acumulando nos 11 primeiros meses do ano case 963.680 usuarios, un 8 % menos que en 2023 (tendo en conta que en maio só abriu seis días por obras na pista). Durante o pasado novembro 936 voos operaron en Peinador, dos cales 696 foron voos comerciais (655 a destinos nacionais e 41 a destinos internacionais). A terminal de carga do Aeroporto de Vigo moveu en novembro 27,7 toneladas de mercadorías.
Así mesmo, o aeroporto da Coruña rexistrou 99.815 pasaxeiros o mes pasado, un 1 % máis, así como máis de 1,13 millóns de usuarios no que vai de ano. O número de voos operados en Alvedro foi de 1165, das que 745 eran comerciais. A terminal de carga coruñesa moveu 4,3 toneladas de mercadorías en novembro.
