Como frear a mortalidade de aves mariñas en artes de pesca?
Varias entidades galegas estudan como reducir a morte de aves en augas galegas.
Por Europa Press / Redacción | SANTIAGO DE COMPOSTELA | 09/01/2025 | Actualizada ás 13:53
Entidades galegas participan nun proxecto para frear a mortalidade de aves mariñas en artes de pesca, unha investigación que busca a implicación do sector pesqueiro. Son, informa o Centro de Extensión Universitaria e Divulgación Ambiental de Galicia (Ceida), catro entidades vinculadas á investigación, conservación e sensibilización sobre o medio mariño. Todas elas colaboran no proxecto 'Noraves' para a procura de solucións á captura accidental de aves na rexión Noratlántica.
Trátase do Centro Oceanográfico da Coruña, dependente do Instituto Español de Oceanografía; SEO/Birdlife; a cooperativa sen ánimo de lucro Corys e o Ceida, que actúa como entidade coordinadora. O proxecto desenvólvese coa colaboración da Fundación Biodiversidade do Ministerio para a Transición Ecolóxica e o Reto Demográfico, a través do Programa Pleamar, e cofinánciase pola Unión Europea polo Fondo Europeo Marítimo, de Pesca e de Acuicultura.
O obxectivo é o seguimento do uso do espazo mariño por parte das especies de aves mariñas a través do monitoreo do seu paso migratorio e a aplicación de técnicas de seguimento para o coñecemento en tempo real dos seus movementos en alto mar e a avaliación da mortalidade accidental existente. Tamén a elaboración dun protocolo de rexistro estandarizado da mesma e un programa participativo e formativo para técnicos e profesionais do sector.
