A Xunta pide "clarificacións" e "compensacións" a Altri antes de pechar a avaliación ambiental que pronto sairá á luz

A conselleira de Medio Ambiente, Ángeles Vázquez, indica que os informes sobre o proxecto de Altri en Palas de Rei "xa están moi avanzados". "É certo que se lle pediron clarificacións á empresa e tamén é certo que se lle piden certas compensacións", explica. "Sempre dixemos que a finais de ano, no primeiro trimestre deste ano" estaría a avaliación ambiental da Xunta sobre o proxecto de fibras téxtiles, polo que espera que se coñeza "pronto".

A preguntas da prensa con motivo dunha reunión coa patronal galega, a conselleira afirmou: "Os prazos non dependen tanto do que nos gustaría, senón da lexislación vixente e as esixencias que temos que facer á empresa". Así, "cada un dos informes sectoriais ten que pecharse xa de modo oficial". Espera que "pronto" se coñeza se a Xunta autoriza ou non o trámite ambiental á fábrica para "despexar esa incógnita" que "é fundamental de cara ao territorio, á sociedade e tamén de cara á empresa e aos postos de traballo que se poidan desenvolver".

Considera que debe haber un "equilibrio fundamental que ten que ser de carácter ambiental". "No momento en que xa estean pechados todos os informes sectoriais de modo oficial, será a Dirección Xeral de Calidade (Ambiental) quen teña a última palabra para dicir se se fixo todo correctamente e, se iso é así, recibirá o impacto favorable; e, se non é así, o desfavorable. "En todo caso, agardamos non tardar moito en facelo porque somos coñecedores de que os informes xa están moi avanzados", resalta.

"QUE LISTOS SON ESTES SEÑORES!"

Nunha entrevista coa Cadena SER, a portavoz de Sumar no Congreso, Verónica Martínez Barbero, afirmou que o seu partido "fará todo o que estea na súa man" para "frear" o proxecto e que confía en que "non reciba" fondos europeos. Recentemente, o líder do PSdeG, José Ramón Gómez Besteiro, tamén dixo crer que non recibirá financiamento do Estado. "Que listos, que hábiles son todos estes señores que coñecen de primeira man o expediente! Cando eu, que estou no día ao día, aínda non son capaz de concluír, porque ata que teña todos os informes asinados e teña a declaración asinada, non me podo lanzar", dixo a conselleira sobre estas palabras.

"Unha cousa é o que me gustaría ou deixaría de gustar, e outra cousa é que temos que ser serios e sensatos", prosegue. "A partir de aquí, non podemos cualificar a ningunha persoa nin aos proxectos polo que a nós gustaríanos, senón que temos que cualificalas por se cumpren a lei e se son beneficiosos para o territorio", conclúe. Demanda que estes políticos "fagan as críticas de carácter construtivo" e "que non defenestren a Galicia". "Non se pode ser máis rigorosos do que estamos a ser coas distintas empresas", garante achega do traballo da Xunta, pois as empresas "teñen queixas das grandes esixencias que se fan en Galicia en relación con outras comunidades autónomas".

Ángeles Vazquez participa na reunion extraordinaria das comisions de traballo da CEG | Fonte: ANA VARELA