Condenado a 14 anos por maltratar, violar e coaccionar á súa muller

A sección cuarta da Audiencia Provincial de Pontevedra condenou a 14 anos de cárcere a un home como autor dos delitos de agresión sexual, malos tratos habituais labor en domicilio común, ameazas contra a muller, lesións contra a muller e coaccións. Ademais, o tribunal impúxolle o pago dunha indemnización á vítima de 8.000 euros, en concepto de dano moral.

Na sentenza, as maxistradas relatan que o acusado e a vítima contraeron matrimonio en 1990 e, desde entón, o condenado ameazou e insultou á súa muller, "creando unha situación de temor constante no ámbito familiar ao que sometía á vítima e que esta acataba polo temor que lle provocaba, dado o seu carácter violento".

A situación creada polo procesado, segundo consta na sentenza, agravouse, polo que a Sala indica que, nos últimos cinco anos, "someteu á denunciante a unha situación de control e sometemento en todas as esferas da vida, controlando os gastos da familia, a maneira na que vestía ou se maquillaba, limitando as relacións de amizade e familiares, sendo escasas as veces que saía de casa sen o seu permiso".

No fallo, as xuízas afirman que, no mesmo período de tempo e de forma habitual, cando a vítima non coincida na súa opinión coa del, "tiráballe obxectos e dáballe patadas", sendo costume mantido no tempo que se dirixise a ela con insultos, tamén en presenza dos seus fillos, maiores de idade.

ACOSO E VIOLENCIA

Ademais, entenden acreditado que nunha ocasión agrediuna sexualmente. Ao día seguinte, cando lle dixo que tiña que cambiar e que, se non, ía deixalo, díxolle que, se o deixaba, matábaa, recolle o fallo. O condenado, segundo consta na sentenza, tamén seguiu o vehículo no que se atopaban a súa muller e a irmá dela por toda a localidade na que residían, cruzando o seu vehículo e impedindo, desta forma, a marcha delas, á vez que, baixándose do coche, insistíalle á vítima para que subise ao seu turismo.

Finalmente, a súa irmá, que conducía o coche, puido continuar a marcha ata o centro de saúde, onde foi asistida, acudindo despois a interpor denuncia. Como consecuencia dos feitos, sufriu tensión postraumática, dano emocional, desarraigamento e dano social prolongado e persistente, segundo sinalan as maxistradas na sentenza, contra a que cabe presentar recurso ante o TSXG.