A Xunta, convencida de que a Ribeira Sacra será Patrimonio Mundial da Unesco en 2026

A Xunta afronta con "boas expectativas" a recta final da candidatura 'Ribeira Sacra: Paisaxe da auga' para ser recoñecida como Patrimonio Mundial da Unesco en 2026. Así o asegurou a directora xeral de Patrimonio Cultural, Mª da Carmen Martínez, na súa participación este venres no Consello de Patrimonio Histórico, que se celebra durante estes días na cidade de Murcia.

"Temos unha candidatura seria, forte e máis que solvente", destacou a representante do Goberno galego, quen defendeu que a Consellería de Cultura, Lingua e Xuventude está a dar "todos os pasos necesarios" e cumprindo "de maneira rigorosa" cos trámites requiridos co obxectivo de que o centro de Patrimonio Mundial da Unesco, situado en París, "teña a documentación definitiva antes do 1 de febreiro". "E así será", afirmou. "Trátase de pasos fundamentais co obxectivo final de que toda a documentación sexa revisada polos organismos avaliadores antes da súa valoración no Comité de Patrimonio Mundial de 2026", sinalou respecto diso.

Tal e como trasladou a Xunta nunha nota de prensa, a representante autonómica lembrou que, a finais do mes de setembro, o conselleiro de Cultura, Lingua e Xuventude, José López Campos, entregoulle en persoa o primeiro avance do expediente da candidatura ao embaixador de España ante a Unesco, Miquel Iceta. Así mesmo, Mª da Carmen Martínez afirmou que desde o Goberno galego tense a "firme esperanza" de que a declaración de Patrimonio Mundial da Ribeira Sacra "será unha realidade a celebrar en 2026".

A directora xeral de Patrimonio Cultural, Mª da Carmen Martínez, participa no Consello de Patrimonio Histórico, que se celebra durante estes días na cidade de Murcia | Fonte: XUNTA