O mar segue desafiando aos barcos galegos: Galicia rexistra 1 de cada 4 accidentes marítimos acontecidos en España
Houbo 76 accidentes na comunidade en 2023, un 24 % máis que en 2022, o peor dato desde 2016.
Por Europa Press / Redacción | SANTIAGO DE COMPOSTELA | 18/01/2025 | Actualizada ás 12:32
Os sinistros marítimos en Galicia atópanse en senda ascendente nos últimos anos e xa supoñen un de cada catro accidentes que se producen en España. Segundo o último informe anual publicado pola Comisión Permanente de Investigación de Accidentes e Incidentes Marítimos (Ciaim), correspondente ao ano 2023, Galicia rexistrou 76 sinistros no conxunto do exercicio, de modo que se mantén como a comunidade con maior número, por encima de Andalucía (51) e Cataluña (40). O global de España foi de 297 accidentes marítimos notificados en 2023, polo que Galicia padece unha cuarta parte deles (o 26 %). Do total, 20 necesitaron que a Ciaim realizase investigación, con tres casos abertos en Galicia (o 15 % destes), mesma cifra que Cantabria e Cataluña, só superado polos catro que houbo en augas exteriores. O feito é que estes 76 accidentes no mar en Galicia son 15 máis que os 62 de 2022, un 24 % máis. Tamén está por enriba de anos previos como 2021 (59) e 2020 (72). Hai remontarse ata 2016 para atopar unha cifra superior á de 2023, xa que foron 79 por entón.
MORTES EN 2023
Este órgano investigador adscrito ao Ministerio de Transportes, Mobilidade e Axenda Urbana expón que do global de 297 accidentes notificados en España a gran maioría correspóndese con perdas de control (213 casos), a moita máis distancia atópanse outras causas como accidentes operacionais (20) e incendios (15). Nos accidentes e incidentes ocorridos en 2023 e investigados pola Ciaim rexistráronse un total de 11 falecidos, dous desaparecidos e 15 feridos graves en todo o país. Entres estes sinistros, houbo accidentes relacionados con Galicia nos seguintes barcos: Novo Alborada (un falecido por caída ao mar dun tripulante); Vila Nores (un falecido en accidente durante a manobra); Novo Xoel (un falecido por caída ao mar) e Cosmos (un falecido por caída ao mar).
INSPECCIÓN DO 'VILLA DE PITANXO'
Esta memoria da Ciaim de 2023 recolle un apartado especial destinado ao Villa de Pitanxo, que se afundiu na madrugada do 15 de febreiro de 2022 en augas de Terranova (Canadá), onde morreron 21 dos 24 mariñeiros a bordo. A Ciaim realizou operacións de procura e inspección do pecio entre maio e xuño do 2023. "Estas operacións resultaron un éxito, ao alcanzarse todos os obxectivos expostos", destaca este órgano investigador. As operacións contratáronse a través dunha licitación pública, adxudicada á compañía española ACSM Shipping. A compañía mobilizou do buque OSV Artabro que, cos medios adecuados, localizou o pecio do buque e levou a cabo unha inspección submarina do mesmo, con información "valiosa" para a investigación en curso. O desenvolvemento das operacións estivo supervisado por tres membros da Ciaim a bordo do Artabro, dous como peritos xudiciais e un representando á Ciaim.
O informe da Ciaim sobre o Pitanxo, coñecido a comezos de 2024, apuntou a un "erro humano" do capitán, Juan Padín, como "causa máis probable" do afundimento do barco. Ademais, daba por "verosímil" a versión do mariñeiro sobrevivente ganés, Samuel Kwesi, Kwesi e vía "incongruencias" na do sobriño do capitán, Eduardo Rial. En concreto, Padín e Rial contaron que o motor do Pitanxo parou de forma repentina, quedando o barco á deriva no medio dunha forte treboada, polo que o mar acabou engulíndoo e con pouca marxe para que os 24 tripulantes puidesen facer algo para salvar as súas vidas. Con todo, Kwesi asegurou que o Villa de Pitanxo embarrara (enganchado as redes ao fondo do mar), polo que o capitán tratou de facer varias manobras para solucionar este problema. Así, o barco comezaría a escorarse ao non ser quen de soltarse, entrando auga ata que o motor se parou, sen escoitar aos mariñeiros que pedían que soltase as redes.
