Detidos con 11 quilos de haxix ocultos nun complexo dispostivo do coche
Son dous madrileños que transportaban a droga baixo os asentos traseiros do vehículo, que contaba cun sistema hidráulico para levantar as butacas.
Por Europa Press / Redacción | SANTIAGO DE COMPOSTELA | 21/01/2025 | Actualizada ás 10:38
Dous veciños de Madrid foron detidos pola Garda Civil despois de ser interceptados cando circulaban pola autoestrada AP-9 ao seu paso por Betanzos cun coche no que transportaban 11 quilos de haxix ocultos nunha caleta dimisulada baixo os asentos da parte traseira.
Os arrestos producíronse o 15 de xaneiro na peaxe de Macenda, en Betanzos, onde a Garda Civil realizaba un control no que deron o alto un vehículo que desprendía un forte cheiro a haxix, segundo informou este martes o Instituto Armado.
Nunha primeira inspección, os axentes non localizaron droga pero si dúas navallas, un machete e 5.000 euros en efectivo. As sospeitas fixeron que a patrulla solicitase a participación dos seus compañeiros especializados na detección de sustancias estupefacientes.
Mobilizados ata o lugar, o can detector marcou a presenza de droga baixo os asentos traseiros dos vehículos, que contaban cun sistema hidráulico que levantaba a parte inferior da butaca, tras a que existía un compartimento oculto.
Os viaxeiros do coche, ambos de Madrid e de 26 anos de idade, cooperaron cos axentes e mostraron o funcionamento do sistema, que contaba cunha consola para activar o mecanismo hidráulico que deixaba ao descuberto o lugar no que transportaban o haxix.
En total, as sustancias intervidas arroxan un peso de 11 quilogramos. Os arrestados foron trasladados a dependencias da Garda Civil antes de pasar, o 16 de xaneiro, a disposición da xuíza do xulgado de primeira instancia e instrución número 3 de Betanzos, que decretou o seu ingreso en prisión.
