Presentan un milleiro de sinaturas ante Sanidade para denunciar "o incumprimento" das 35 horas para o persoal do Sergas

O sindicato O'Mega presentou este martes, polo rexistro da Consellería de Sanidade, un escrito asinado por un milleiro de médicos para denunciar o "incumprimento" da xornada de 35 horas semanais para todo o persoal do Servizo Galego de Saúde (Sergas). Trátase dunha medida que se aplica desde o 1 de xaneiro de 2025, en virtude dun acordo asinado en abril de 2023.

Para facela efectiva en atención primaria (centros de saúde e PAC), a Consellería propuxo que os sábados pola mañá, que pasan a ser xornada complementaria, se cubrisen a través de bolsas de médicos voluntarios, que cobrarían unha compensación. Se estes non chegan, habería que facer rotacións obrigatorias. A través dun comunicado, O'Mega critica que "a falta de suficientes voluntarios provoca que, na práctica, traballar os sábados siga sendo obrigatorio". Neste sentido, o sindicato reclama ao Sergas "o cumprimento do acordo" e que estes profesionais sexan debidamente compensados, a través de incentivos tanto económicos como de descanso.

Ademais, no escrito rexistrado polo presidente de O'Mega, Manuel Rodríguez, e outras responsables da organización, reclaman unha "reunión urxente" coa Consellería de Sanidade, porque advirten que adoptarán "todas as medidas legais ao seu alcance para pór fin a esta discriminación laboral" dos médicos con respecto a outras categorías do Sergas "que si cumpren xa" as 35 horas. Estas críticas súmanse ás do resto de sindicatos, que se concentraron a semana pasada fronte á Consellería para pedir que a instrución sobre as bolsas de voluntarios se aplicase tamén a outras categorías que teñen que traballar os sábados pese ao descenso da xornada.