O BNG sinala que Galicia perde "máis de 700 millóns" co veto do PP ao decreto ómnibus
Os nacionalistas presentaron unha batería de iniciativas relativas ás consecuencias para Galicia da perda das entregas a conta que lle corresponden polo sistema de financiamento
Por E.P. | Santiago de Compostela | 23/01/2025 | Actualizada ás 16:20
O BNG denunciou este xoves que o veto do PP ao Real decreto estatal coñecido como decreto ómnibus faille perder a Galicia máis de 700 millóns de euros, segundo as propias estimacións do Ministerio de Facenda.
Nun comunicado, a deputada Noa Presas advertiu que, ademais de votar en contra das persoas pensionistas e dos usuarios do transporte publico, o PP volveu votar " en contra do financiamento de Galicia" porque no decreto derrogado cos votos do PP, Vox e Junts ía tamén a fórmula para que, ao non haber presupostos do Estado, este pague ás comunidades as entregas a conta pendentes do sistema de financiamento.
"É algo gravísimo e pediremos no Parlamento que o PP de Rueda obedeza aos intereses de Galicia e negocie directamente co Estado como ter eses recursos", e isto pasa porque "os deputados galegos do PP escolleron ser palmeiros de Feijóo no canto de defender a Galicia", afirmou.
E é que, segundo sinalou Noa Presas, trátase dunha "cifra importantísima" porque "se o marco de financiamento é inxusto e non cobre as necesidades" de Galicia trátase de "perder 700 millóns de euros que poderían ir reforzar a atención á saúde mental ou a aumentar as pensións non contributivas que o PP pretende conxelar".
O BNG presentou unha batería de iniciativas relativas ás consecuencias para Galicia da perda das entregas a conta que lle corresponden polo sistema de financiamento. Sistema que, tal e como recolle nas iniciativas, xa supón para Galicia unha infrafinanciación de máis de 1.500 millóns de euros cada ano.
A isto, conforme indica o BNG, hai que sumarlle a "neglixente estratexia da Xunta de Galicia" de non negociar co Estado nin un mellor financiamento nin tampouco unha quita da débeda.
O BNG considera que esta cuestión afectará aos galegos e galegas e ao funcionamento dos instrumentos de Galicia e dos seus servizos públicos, polo que dixo que é urxente que o Goberno galego avalíe esta situación e reconsidere cambiar o seu papel de submisión á axenda estatal por un papel de defensa dos intereses de Galicia.
Entre as iniciativas presentadas está a de que o Parlamento galego exprese a súa preocupación pola afectación para Galicia do bloqueo das entregas a conta pendentes do sistema de financiamento e de demanda da Xunta que poña por diante os intereses galegos, negociando co Goberno central unha saída e comprometéndose a non afectar o funcionamento dos servizos públicos ante esta perda de recursos.
Tamén se preguntará á Xunta do PP que fará para favorecer o desbloqueo das entregas a conta, defendendo os intereses de Galicia por encima dos intereses partidarios e se ten avaliado as repercusións para Galicia no caso de non recibir as entregas a conta pendentes, e tamén polo impacto da equivalente situación nos concellos galegos.
Ademais, o BNG preguntará no Parlamento polas propostas que fará o Goberno de Rueda neste ámbito e que recortes aplicará de non conseguir este financiamento.
