Escotet destaca o papel de Abanca no crecemento galego financiando empresas e familias
Con respecto a Galicia, o presidente de Abanca sinalou que é unha das comunidades con maior crecemento, grazas ao comportamento de ámbitos como os servizos, o turismo ou as exportacións, e destacou que, neste "crecemento diferencial", Abanca foi "un actor relevante como principal financiador de empresas e familias"
Por E.P. | SANTIAGO DE COMPOSTELA | 23/01/2025 | Actualizada ás 19:22
O presidente de Abanca, Juan Carlos Escotet, participou este xoves nun xantar coloquio organizado polo Círculo de Empresarios en Vigo, no que puxo en valor o papel que a entidade xogou no crecemento económico de Galicia na última década, como principal financiador de empresas e familias.
Na súa intervención ante un grupo de empresarios e autoridades (entre as que estaban os conselleiros de Emprego e de Facenda, o delegado da Zona Franca, ou a vicepresidenta da Deputación de Pontevedra), Juan Carlos Escotet fixo unha análise dos desafíos que presenta a nova orde mundial e as perspectivas económicas.
Tras referirse a a "disparidade entre bloques" (Estados Unidos/eurozona), precisou que as perspectivas en España apuntan a que continúe o crecemento no trienio 2025-2027, "superior ao de Europa, pero con algunhas debilidades".
Esas previsións, ao seu xuízo, teñen como principal "ameaza" unha contorna xeopolítica "con grandes desafíos", derivados das tensións arancelarias que se prevén co goberno de Trump, do conflito en Oriente Medio, ou da guerra en Ucraína.
APOIO AO TECIDO EMPRESARIAL GALEGO
Con respecto a Galicia, o presidente de Abanca sinalou que é unha das comunidades con maior crecemento, grazas ao comportamento de ámbitos como os servizos, o turismo ou as exportacións, e destacou que, neste "crecemento diferencial", Abanca foi "un actor relevante como principal financiador de empresas e familias".
Nese sentido, remarcou o servizo da entidade ao tecido empresarial, ao que dirixiu o 70 % do novo crédito concedido na última década, e subliñou que esa aposta polas empresas teñen o seu reflexo directo na economía galega.
Segundo incidiu, esta achega aumentou desde 2015 debido a que o crédito e o emprego de Abanca en Galicia creceu fronte á caída do resto de bancos, e lembrou que se mantén como única entidade financeira en 175 municipios, 50 máis que en 2015.
Pola súa banda, a presidenta do Círculo de Empresarios, María Borrás, tamén subliñou o papel "insubstituíble" de Abanca en Galicia e o "compromiso" cos proxectos empresariais. Tras eloxiar que a entidade é un referente en eficiencia e dixitalización, valorou que "non descoida a atención prioritaria ás persoas".
