A Xunta defende o acordo co Mercosur porque é un pacto coa UE e o BNG critica a súa "perigosidade"

O BNG alertou este mércores sobre o "perigo" para o sector agrogandeiro galego do acordo entre a Unión Europea e Mercosur, que facilitará o intercambio comercial sen aranceis entre os países europeos e os que forman o bloque económico suramericano: Arxentina, Brasil, Paraguai e Uruguai.

Así o fixo nunha interpelación defendida esta tarde polo deputado nacionalista Secundino Fernández no pleno do Parlamento de Galicia. Alí, falou da "xigantesca" produción gandeira dos países de Mercosur e da dificultade que terán as pequenas e medianas explotacións galegas para competir cos prezos "moi baixos" de produtos importados.

Respecto diso, Fernández dixo que estes países teñen lexislacións máis "laxas" que as europeas, respecto de aspectos ambientais ou dereitos laborais, entre outros temas, o que porá en "perigo" a competitividade das empresas de Galicia. Por todo iso, pediu á Xunta que tome medidas para contrarrestar este "macroacordo" que é, ao seu xuízo, "incomprensible", porque incrementará as emisións contaminantes e suporá o empobrecimiento do sector agrogandeiro, coa desaparición de pequenas e medias explotacións que non poderán competir.

Protesta de representantes do SLG polo acordo UE-Mercosur. SLG

ACORDO DA UE

Esta interpelación foi respondida pola conselleira de Medio Rural, María José Gómez Rodríguez, quen asegurou que o Executivo autonómico pedirá ao Goberno central que solicite "cláusulas espello" para que ningún alimento de Mercosur compita en "desigualdade de condicións" cos produtos galegos. Na súa intervención, dixo que todas as importacións deses países deberían cumprir as mesmas lexislacións vixentes en Europa, relacionadas, por exemplo, cos pesticidas e antibióticos que se poden utilizar, entre outros aspectos.

Gómez Rodríguez subliñou que este acordo con Mercosur está enmarcado na Unión Europea e ten que ser ratificado polos estados membro, polo que solicitou ao ministro de Agricultura, Pesca e Alimentación, Luís Planas, unha reunión, que aínda non foi concedida, para coñecer en detalle o acordo. A conselleira reivindicou o seu traballo dentro das súas competencias, co obxectivo de diferenciar a calidade dos produtos galegos e facelos máis competitivos fronte a competidores.