Xunta e Unións Agrarias abordan o prezo do leite galego a dous meses de que se renoven o 90 % dos contratos

A conselleira do Medio Rural, María José Gómez, reuniuse este martes co secretario xeral de Unións Agrarias (UU.AA.), Roberto García, e con outros responsables da organización, para abordar o "diferencial" de prezo do leite galego respecto da media española. En declaracións aos medios antes de iniciar a reunión, García asegurou que existe "sintonía" en compartir o diagnóstico dun "problema" que ten Galicia "desde sempre" respecto do leite. Segundo sinalou, esta problemática baséase no feito de ter uns prezos inferiores ao resto do Estado "sen que haxa, neste momento, razóns económicas ou xurídicas que xustifiquen este diferencial".

A reunión, na que tamén participaron os directores xerais de Gandaría, Agricultura e Industrias Agroalimentarias, José Balseiros, e da PAC e Control da Cadea Alimentaria, Juan José Cerviño, organizouse con motivo da campaña 'Prezo xusto xa para o leite galego', presentada por UU.AA. o pasado venres. Neste contexto, o representante de UU.AA. lembrou que o próximo 1 de abril renovaranse o 90 % dos contratos de leite en Galicia. Deste xeito, a titular do Medio Rural asegurou que "ante a inminente renovación dos contratos do leite", a postura da Consellería baséase en que "ese diferencial que ten Galicia co resto de España ten que reducirse, porque é unha situación inxusta".

"NON QUEREMOS SER MÁIS QUE NINGUÉN, PERO TAMPOUCO MENOS"

Así mesmo, García apelou a traballar conxuntamente coa administración para que esta situación "de agravio comparativo" se corrixa e defendeu que esta industria "deixaría de existir" sen os gandeiros. "O leite galego é de excelente calidade e as industrias sábeno, por iso se achegan a Galicia, pero a mellor maneira de apostar polos produtores galegos é ofrecéndolles un prezo xusto. Non queremos ser máis que ninguén, pero tampouco menos", aseverou a conselleira. Neste sentido, Unións Agrarias asegurou que os gandeiros galegos viven unha "dobre desigualdade" porque, segundo detallou, cobran catro céntimos menos que a media de España e producen un produto "de mellor calidade".

Por iso, a organización expuxo unha serie de peticións dirixidas ás distintas administracións. No caso do Executivo galego, esixiulle a posta en marcha de 'Aica galega' con persoal e recursos para que poida actuar de forma "inmediata e autónoma". Así mesmo, solicitou ter "mediadores" que acompañen a negociación colectiva e tamén que "lexisle" para que aquelas industrias que non teñan "sancións graves" por incumprimento da cadea alimentaria, "teñan máis puntuación á hora de concorrer a axudas públicas".

A conselleira do Medio Rural, María José Gómez, reunida co secretario xeral de Unións Agrarias (UU.AA.), Roberto García, e con outros responsables da organización | Fonte: MONICA ARCAY CARRO