Detidas tres persoas en Lalín adicadas á falsificación de documentación para obter permisos de residencia

Axentes da UCRIF da Policía Nacional detiveron a tres persoas residentes en Lalín por achegar documentación falsa en procesos de solicitude de permisos de residencias para estranxeiros. A investigación, froito da coordinación entre a Policía Nacional e a Oficina de Estranxeiros da Subdelegación do Goberno en Pontevedra, iniciouse hai varios meses, cando se detectou un número inusual de solicitudes de residencia por parte de cidadáns estranxeiros residentes en Lalín, sempre baixo a mesma forma de presentación.

Tras a revisión de múltiples expedientes pescudouse que os investigados achegaban un mesmo pack documental, que contiña facturas de servizos, cursos formativos ou xustificantes médicos para acreditar a permanencia continuada en España os anos previos, e obter así a correspondente autorización de residencia.

As pescudas permitiron constatar máis dunha ducia de solicitudes que contiñan documentos falsos, mesmo de solicitantes que non residían en territorio nacional, polo que, grazas á colaboración coa Policía Local de Lalín, a Policía conseguiu localizar e deter a varios dos investigados. Esta é a segunda operación levada a cabo pola Policía Nacional desta mesma natureza, tras a realizada fai un par de meses pola UCRIF da Xefatura Superior de Galicia. Dos feitos deuse conta ao Xulgado de Instrución de Vigo en funcións de garda, e a investigación segue aberta, polo que non se descartan novas detencións.