Unha web da USC animará ás persoas restituír os apelidos galegos na súa forma orixinal
Para animar á restauración correcta dos apelidos galegos iniciouse unha campaña audiovisual na que tamén convida a todas as persoas a elaborar un pequeno vídeo no que contar a súa experiencia persoal nese proceso.
Por Europa Press / Redacción | SANTIAGO DE COMPOSTELA | 13/02/2025 | Actualizada ás 19:29
A comisión de normalización lingüística da Facultade de Filoloxía da USC presentou este xoves unha web que facilita toda a información necesaria para restituír os apelidos á súa forma galega correcta, algo que desde o ano 2011 permite a Lei do rexistro civil pero que moita xente descoñece.
Na presentación deste recurso participaron o vicerreitor de Transformación Dixital e Innovación, Gumersindo Feijoo; a vicedecana da Facultade, Elsa González Álvarez, e a catedrática e académica da RAG Ana Boullón.
Tal e como explicaron, calquera persoa inscrita no rexistro civil pode solicitar a adecuación dos seus apelidos ás particularidades lingüísticas do galego, "en calquera momento, de forma gratuíta, sen que sexa preciso alegar ningunha causa ou xustificar o uso habitual deste apelido na vida cotiá".
Para animar á restauración correcta dos apelidos galegos, a comisión puxo en marcha unha campaña audiovisual na que tamén convida a todas as persoas a elaborar un pequeno vídeo no que contar a súa experiencia persoal nese proceso.
Tal e como lembra a USC, a Real Academia Galega (RAG) conta cun buscador cos 6.000 apelidos máis frecuentes en Galicia para poder comprobar se un apelido é galego e como se escribe correctamente.
