Lores saca adiante o orzamento municipal de Pontevedra co voto a favor do PSOE
A cidade renomea tres rúas como Veiga do Cobo, Avenida das Chan e Josefa Vázquez Juncal 'señora Pepa'
Por Europa Press / Redacción | SANTIAGO DE COMPOSTELA | 17/02/2025 | Actualizada ás 17:58
O goberno do BNG no Concello de Pontevedra, dirixido por Miguel Anxo Fernández Lores, aprobou este luns o orzamento municipal para 2015, por 98,6 millóns de euros, co voto a favor do PSOE. O Partido Popular rexeitou as contas.
O concelleiro de Facenda, Raimundo González Carballo, destacou a boa situación económica do Consistorio, cunha débeda de algo máis de seis millóns de euros, nun municipio que leva once anos seguidos con todas as súas taxas e impostos conxelados e que se sitúa entre os concellos con menos presión fiscal de España. Tamén defendeu que este orzamento permitirá destapar o río de Os Gafos ao seu paso polo barrio de Campolongo, crear un novo parque na Parda, organizar unha nova edición dos Premios Feroz ou acoller o Campionato do Mundo de Tríatlon Multideporte, entre outros investimentos.
Pola súa banda, o portavoz local do PP, Rafa Domínguez, presentou unha emenda á totalidade destes orzamentos argumendo que as contas do goberno local contemplan un "bajísimo gasto social" algo vinculou o cun suposto aumento da inseguridade cidadá. Tamén criticou que se reduza o diñeiro destinado a deportes ou iluminación pública. "Condenan a Pontevedra a seguir na decadencia na que entrou nos últimos anos", sostivo.
Ademais, Rafa Domínguez reprochou ao PSOE o seu apoio a estes orzamentos, mentres que o portavoz socialista, Iván Puentes, defendeu a súa postura: "Nós non participaremos nesa estratexia de crispación do PP". Puenntes reivindicou o sentido do seu voto dicindo que prefire "avanzar con 30 acordos que non facelo", en referencia aos compromisos pactados co Bloque que se cifran en 4,1 millóns de euros para novos proxectos, obras e melloras de servizos.
TRES NOVAS DENOMINACIÓNS AO RUEIRO
Así mesmo, nesta sesión plenaria aprobouse a nova denominación de tres cales: Veiga do Cobo, Avenida das Chan e Josefa Vázquez Juncal 'señora Pepa', atendendo ao criterio do Concello de Pontevedra de conservar a toponimia tradicional municipal e o seu compromiso para que máis mulleres teñan este recoñecemento no rueiro da cidade.
Estes cambios contaron co apoio dos cinco edís do PSdeG-PSOE mentres que o PP votou en contra de todos eles. A concelleira popular Pepa Pardo xustificou o voto en contra da súa formación indicando que os populares se negarán a calquera proposta de denominación de rúas ata que se cumpra o acordo plenario para incorporar ao empresario Magín Froiz ao rueiro.
