O BNG acusa á Xunta de ter arrastrado a Galicia ao "fracaso natalista" co seu "simple postureo"

A parlamentaria do BNG Noa Presas denunciou este venres que os últimos datos demográficos do Instituto Nacional de Estatística (INE) "co segundo peor saldo vexetativo desde que hai rexistros" certifican o "fracaso natalista" dos 15 anos do PP na Xunta, con políticas que tachou de "simple postureo" e que demostran que o Goberno de Alfonso Rueda "carece de proxecto político e non toma en serio as condicións de vida dos galegos e galegas".

Así o trasladou, en rolda de prensa, a deputada do BNG Noa Presas, que cualificou de "ciencia ficción" a revitalización demográfica que o PP di impulsar desde a Xunta con "políticas que basicamente son titulares e anuncios estrela". "Políticas que no canto de ser estratéxicas e transversais responsabilizan ás mulleres cun enfoque profundamente reaccionario e políticas que nos últimos anos expulsaron a máis de 218.000 menores de 34 anos que podían facer aquí o seu proxecto de vida", apostilou.

"A pesar de ser un país rico en talento, rico en recursos naturais e cunha posición estratéxica para moitos sectores económicos, imos a menos", lamentou Presas, subliñando que mentres no conxunto do Estado "os nacementos crecen por primeira vez na última década, Galicia vai a peor, en dirección contraria". Presas advertiu que non se pode fixar poboación se non hai "empregos dignos, unha casa onde vivir e se non hai servizos públicos para conciliar", e tamén incidiu no "fracaso" da lei de impulso demográfico.

Unha norma que, a xuízo do Bloque, responde a "unha óptica desfasada, sen ampliar dereitos, sen mellorar os servizos de atención á infancia e á xente maior e con medidas ridículas, como reservar aparcadoiros para familias nos centros comerciais ou pór unha etiqueta de calidade a comercios e empresas con cambiador para bebés". Unha lei que, proseguiu, non responde o "problema de fondo" vinculado ao emprego. A continuación, a dirixente nacionalista tamén incidiu na falta de pediatras ou a "escasa oferta de escolas infantís" e o "colapso" na atención á dependencia.

Fronte á visión do BNG, o portavoz parlamentario do PPdeG, Alberto Pazos Couñago, defendeu as políticas autonómicas en materia demográfica e social. Pazos referiuse á recente enquisa de condicións de vida publicada polo INE para destacar que, "tendo sempre moi presente que todo o que se faga para combater a pobreza e mellorar o nivel de vida dos galegos será pouco", é "para sentirse orgullosos do traballo que fan os executivos populares, en especial a Consellería de Política Social. "Outro dato que merece terse en conta desta enquisa do INE é a relativa á renda media por fogar, xa que Galicia rexistrou o pasado ano un incremento do 11,5 %, ata situarse en 34.892 euros por fogar e achegarse aos case 37.000 euros da media nacional", apuntou Pazos.

O PSDEG LAMENTA A FALTA DE ACORDOS EN BRUXELAS

O PSdeG criticou que o presidente da Xunta, Alfonso Rueda, volvese da súa viaxe a Bruxelas "sen propostas nin acordos": "Foi a Bruxelas a facer dúas fotos e un vídeo. Ese foi o seu traballo dunha semana", denunciou. Nunha rolda de prensa celebrada este venres na sede do PSdeG, o portavoz da Executiva do PSdeG, Xullo Torrado, cualificou de "viaxe sen sentido" a visita do titular do Goberno galego e referiuse a tres cuestións que "o propio Rueda marcou como relevantes".

A primeira, o encontro co comisario de Pesca, "compañeiro seu do Partido Popular Europeo", do que, segundo dixo, non se coñece "ningunha concreción nin proposta nin ningún acordo" a pesar de que o sector do mar sofre en Galicia un "problema grave" de descenso de capturas, especialmente no que se refire ao marisqueo. "Nin os seus compañeiros nos toman en serio", remarcou para referirse tamén á reunión con Teresa Ribera, "á que o PP tentou boicotear" para que non formase parte da comisión, co resultado dun "ridículo espantoso". Torrado dixo que "lle foi a explicar" a Ribera que os socialistas galegos teñen "razón" ao asegurar que "hai unha parálise eólica en Galicia", fronte á que tratou de ver "se alguén lle pode botar unha man".

Ademais, censurou que "fose ofrecer alí información que aquí se nega" sobre proxectos importantes para Galicia. "Por que quere falar alí e non aquí?", preguntou para considerar que "parece que ten moito máis que esconder que ensinar". Por último, criticou que Rueda fose ao Comité Europeo das Rexións a falar en galego cando "o PP votou en contra do emprego do galego tamén no Parlamento europeo". "Eu non sei se é cínico ou non sabe o que vota. Calquera das dúas cousas é preocupante", afirmou. Ademais, censurou que, nesa intervención, o presidente demandase unha maior descentralización dos fondos "cando os seus eurodeputados e todos os do PP votaron a favor de que eses fondos estean máis centralizados nos estados e menos nas rexións".