Galicia agarda "pronto" o si do Goberno para completar a Policía autonómica tras o pacto asinado con Cataluña

O Goberno galego espera recibir "pronto" unha "resposta afirmativa" do Ministerio do Interior sobre a súa demanda para completar a unidade da Policía autonómica, sobre todo despois de transcender este luns que acordou coa Generalitat alcanzar os 25.000 Mossos d'Esquadra en 2030. A Xunta demandou reiteradamente cubrir o catálogo de persoal previsto para a unidade adscrita a Galicia, establecido en 500 axentes.

Actualmente, o corpo conta con 344 membros, o que supón "un déficit superior ao 30 % e que irá en aumento coas xubilacións". A preguntas dos medios, o conselleiro de Presidencia, Xustiza e Deportes, Diego Calvo, aludiu á noticia sobre o pacto de Cataluña e lembrou que a Xunta está a falar "ao máis alto nivel" co Ministerio para tratar de chegar a un acordo con respecto á unidade de policía adscrita.

"Temos moitas funcións que levamos a cabo e a verdade é que hai que agradecer o esforzo que están a levar a cabo todos os axentes; pero dado o carácter minguante, ben porque ascenden ou porque se xubilan, cada vez temos, como saben vostedes, menos efectivos, e faise moi complicado poder prestar os servizos coa calidade que é necesaria", reflexionou.

Así as cousas, concluíu que o Executivo autonómico espera unha resposta "pronto". "Fixemos algunha aproximación e espero que ao longo desta semana ou na seguinte teñamos unha resposta afirmativa, sobre todo vendo cales son as reclamacións que se fan doutras comunidades e o que está disposto a ceder o Ministerio", resolveu.