Topar os prezos de aluguer e axudas públicas da Xunta, receitas do BNG para facer fronte a "misión imposible" da vivenda

O BNG receitou ante a "misión imposible" na que se converteu o mercado da vivenda limitar os prezos do aluguer acompañado dun programa propio da Xunta de axudas económicas a mozas e colectivos con menos rendas. Así o trasladou a líder frontista, Ana Pontón, tras manter na mañá deste luns un encontro con dous mozos que viven no Ensanche de Santiago para coñecer de primeira man a realidade do mercado de aluguer na capital galega.

Acompañada pola deputada Alexandra Fernández, Pontón coñeceu os casos de Iago e Iria, que recoñecen ter "sorte" cun piso que comparten con outra persoa e polo que pagan máis de 250 euros por cabeza, situado na planta cuarta e que non dispón de ascensor. "Por menos de 200 euros por cabeza non atopas nada", relataron os estudantes na charla compartida no salón da súa casa. Nos seus catro anos en Santiago apreciaron os cambios no mercado do aluguer e o paulatino incremento de prezos que contrasta, en moitos casos, coa calidade das vivendas que se poñen a disposición dos universitarios.

Así, Iago relatou algunha das "experiencias horribles" vividas na súa etapa na capital galega, con pisos con habitacións sen xanelas, cheos de humidades que provocaban problemas de saúde aos seus compañeiros e, en ocasións, sen que os propietarios facilitasen un contrato legal. "O acceso á vivenda converteuse nunha das principais preocupacións da sociedade, que afecta a familias, aos mozos e, en xeral, á xente con menos recursos", remarcou ante os medios Pontón, que advertiu sobre o "incremento expoñencial" nos prezos que fai do aluguer "unha misión imposible".

Isto, segundo a líder frontista, supón un factor de "xeración de desigualdades" no que a Xunta "no canto de ser parte da solución" converteuse "en parte do problema" por "dinamitar"  as políticas sociais de acceso á vivenda. Entre elas, Pontón sinalou a carencia de medidas para "mobilizar vivenda baleira" a pesar de plans que supuxeron "fracasos" ou o "descontrol" dos pisos turísticos cun rexistro autonómico que, di, é un "coador" que aproveitan os propietarios para "legalizar" a súa situación.

PROPOSTA DO BNG

Fronte a isto, o BNG propón á Xunta que realice unha "compra masiva" de vivenda baleira para pola no mercado a "prezos razoables" para o seu aluguer e adoptar medidas "reais" que "freen o descontrol das VUT" e faga que estas "volvan ao mercado". Ademais, os nacionalistas avogan por limitar os prezos de aluguer, unha medida que "non é suficiente", segundo Pontón, se non se acompaña con axudas con fondos propios da Xunta orientadas a mozos e outros colectivos con rendas baixas que dificultan o seu acceso á vivenda.

A portavoz nacional do BNG, Ana Pontón, e a deputada Alexandra Fernández con dous novos estudantes no seu piso de Santiago para falar sobre a situación do mercado de aluguer | Fonte: BNG