O PSdeG acusa a Rueda de pensar no seu partido e non en Galicia por criticar a quita da débeda

A deputada do Grupo Parlamentario Socialista e portavoz de Economía, Patricia Iglesias, denunciou este venres a "falta de claridade" do presidente da Xunta, Alfonso Rueda, sobre a quita da débeda e pediu que "non tome por parvos aos galegos".

Nun comunicado, a parlamentaria socialista lamentou a postura do PP en relación coa proposta do Goberno central de condonar 4.010 millóns de euros da débeda pública galega, destacando que "esta medida permitiría reforzar os servizos públicos e mellorar a calidade de vida da cidadanía galega". "É incomprensible que o presidente Rueda rexeite unha condonación de débeda que aliviaría significativamente as finanzas da nosa comunidade, permitindo investir máis en educación, sanidade e servizos sociais", declarou.

A socialista sinala que "a súa actitude obstinada priva a Galicia dunha oportunidade única para mellorar o benestar dos seus habitantes" e lembra que "os intereses desta débeda constitúen unha das principais partidas de gasto nos orzamentos da Xunta". Por iso, critica a falta de claridade de Rueda sobre se aceptará ou non a condonación proposta. "O presidente da Xunta mantén unha posición ambigua, evitando comprometerse claramente coa aceptación dunha medida que beneficiaría a toda a cidadanía", afirmou.

PPdeG

O portavoz parlamentario do PPdeG, Alberto Pazos, insistiu en que o Goberno central, coa proposta de condonación da débeda só busca "cumprir as esixencias dos seus socios independentistas cataláns".

É máis, en rolda de prensa, deu por feito que, "unha vez que vexan rebaixada a súa débeda na cantidade que estimaron conveniente, darán un paso máis nas súas esixencias para manter a Pedro Sánchez na Moncloa e pedirán a aprobación do seu concerto económico".

Pazos remarcou que "a débeda non se elimina dunha plumada, senón que unicamente cambia de mans, pasando das comunidades autónomas á caixa xeral do Estado, co que se pasa a pagala todos os españois".