Derek Gee coróase en 'O Gran Camiño 2025'
O ciclista canadense levou o triunfo final, mentres que Magnus Cort Nielsen gañou a última etapa entre Betanzos e Santiago.
Por Europa Press / Redacción | Santiago de Compostela | 02/03/2025 | Actualizada ás 20:32
O presidente da Xunta, Alfonso Rueda, participou este domingo na entrega de premios da carreira ciclista 'O Gran Camiño 2025', unha cita que se consolidou como unha das "máis importantes" do calendario ciclista español e na que o canadense Derek Gee logrou o triunfo final.
Deste xeito, Rueda acudiu este domingo ata a Alameda compostelá para formar parte do final da quinta e última etapa, disputada entre Betanzos e Santiago, de 'O Gran Camiño', unha carreira ciclista que este ano celebra a súa cuarta edición. Con todo, a Xunta detallou nunha nota de prensa que o presidente participou na entrega de premios na que o danés Magnus Cort Nielsen recibiu o galardón por esta etapa.
