Estamparlle un vaso na cara a outro home en Ribeira pode saírlle caro: 3 anos de cárcere e 20.000 euros de indemnización
O golpe causou importantes danos na cara e a dentadura da vítima, que non se recuperou totalmente das lesións ata cinco meses despois.
Por Europa Press / Redacción | SANTIAGO DE COMPOSTELA | 09/03/2025 | Actualizada ás 12:33
Un home enfróntase a unha petición de tres anos de cárcere por agredir en Ribeira cun vaso na cara a outro home, que tardou máis de cinco meses en recuperarse. Os feitos, que tiveron lugar en xullo de 2019 na localidade barbancesa, serán xulgados o vindeiro xoves 13 de marzo na sección sexta da Audiencia Provincial da Coruña, con sede en Santiago.
No seu escrito de acusación, Fiscalía reclama unha condena de tres anos de cárcere e unha indemnización á vítima de 20.000 euros por un delito de lesións. A agresión produciuse na madrugada do 10 de xullo de 2019, cando o acusado estampou un vaso na cara dun mozo de 23 anos para, a continuación, marchar do lugar. O golpe causou importantes danos na cara e a dentadura da vítima, que non se recuperou totalmente das lesións ata o mes de novembro dese ano.
