Unha odontóloga do Sergas que entrou ata en 40 ocasións na historia clínica dunha compañeira enfróntase a 3 anos de prisión
Por mor destes accesos, puido coñecer que a vítima estaba a seguir tratamento no servizo de psiquiatría do Centro de Especialidades de Mollabao, Pontevedra, accedendo "sen xustificación algunha e sen contar coa autorización da interesada", aos informes emitidos polo servizo de psiquiatría.
Por Europa Press / Redacción | PONTEVEDRA | 09/03/2025 | Actualizada ás 16:41
A sección cuarta da Audiencia Provincial de Pontevedra xulgará o vindeiro martes, día 11, a unha odontóloga do Sergas que entrou sen permiso ata en 40 ocasións na historia clínica dunha compañeira. Segundo recolle o escrito de acusación fiscal, ambas as mulleres exercían como odontólogas en centros hospitalarios da área de Pontevedra. No período comprendido entre 2013 e 2021, a procesada chegou a acceder en corenta ocasións ao historial clínico da vítima, sen que esta llo solicitase e a pesar de que non a trataba como paciente.
Por mor destes accesos, puido coñecer que a vítima estaba a seguir tratamento no servizo de psiquiatría do Centro de Especialidades de Mollabao, Pontevedra, accedendo "sen xustificación algunha e sen contar coa autorización da interesada", aos informes emitidos polo servizo de psiquiatría. O Ministerio Público considera os feitos constitutivos dun delito continuado contra a intimidade cometido por funcionario público, e pide para o acusada tres anos e tres meses de prisión e inhabilitación absoluta durante nove anos. Tamén reclama para a denunciante unha indemnización de 4.000 euros en concepto de dano moral.
