O Sindicato Labrego Galego demanda á Xunta información sobre a axuda da colleita en verde para viticultores da Ribeira Sacra

O Sindicato Labrego Galego (SLG) solicita á Xunta información sobre a axuda relativa á colleita en verde na comarca de Ribeira Sacra, co obxectivo de trasladarlla aos viticultores. Nun comunicado de prensa, a organización sinala que a Consellería de Medio Rural "tivo que ter enviado o pasado 1 de marzo os importes calculados da axuda da colleita en verde" ao Ministerio de Agricultura. Tamén se refire aos criterios de selección e ás súas puntuacións.

"Dado que o fin do período de solicitudes é xa o 30 de abril e que é a primeira vez que esta axuda se solicita na Ribeira Sacra", o sindicato dirixiu un escrito ao director xeral de PAC, Juan José Cerviño, no que solicita resposta a varias cuestións para poder informar os viticultores. En concreto, pregunta polo importe calculado para a compensación dos custos directos da eliminación dos acios de uva e para a compensación da perda de ingresos vinculado a esa supresión.

Tamén pregunta se a consellería vai establecer superficie mínima e máxima e, se é o caso, cales son esas superficies. Así mesmo, quere saber como vai ser a xustificación da man de obra propia do titular da viña que elimine en por si os acios. Pide, ademais, campañas de referencia para o rendemento medio das parcelas e data aproximada de publicación da convocatoria e prazo para solicitar.

Un vendimador recolle a colleita no viñedo da Adega Algueira do D.O. Ribeira Sacra de Lugo en Doade, Lugo | Fonte: Europa Press - Arquivo