Tralo sétimo inverno consecutivo máis cálido do normal, agárdase unha primavera moi calorosa

Este inverno foi o sétimo consecutivo máis cálido do normal, segundo o resumo climático do inverno 2024-2025 da Axencia Estatal de Meteoroloxía (AEMET). En concreto, a temperatura sobre a España peninsular foi de 7,8 ºC; o que supón 1,2 °C máis que a media desta estación segundo o período de referencia 1991-2020. Á súa vez, o organismo estatal avanzou que a primavera terá temperaturas por enriba do normal, sobre todo en zonas costeiras e arquipélagos. En canto ao inverno, foi o sexto máis cálido desde o comezo da serie en 1961 e o quinto do século XXI. De acordo co organismo estatal, só un inverno dos últimos dez foi máis frío do normal, o de 2017-2018; mentres que tres foron cálidos e seis, moi cálidos. Doutra banda, AEMET especifica que no transcurso do último inverno non se rexistrou ningunha onda de frío, algo que sucede por segunda vez consecutiva.

Así, o inverno (período comprendido entre o 1 de decembro de 2024 e o 28 de febreiro de 2025) tivo un carácter cálido ou moi cálido en practicamente toda a España peninsular e en Baleares. No que respecta a Canarias, a estación tivo un carácter variable dunhas zonas a outro pero resultou en conxunto moi cálido. Así, decembro foi cálido e xaneiro e febreiro, moi cálidos. Aínda así, entre o 13 e 19 de xaneiro rexistráronse as temperaturas máis frías da estación, con intensas xeadas nocturnas, aínda que con valores diúrnos ao redor do normal. O día 14, Molina de Aragón (Guadalaxara) chegou a -11,2 ºC, o rexistro máis baixo de todo o inverno en estacións da rede principal.

Segundo AEMET, os episodios cálidos para a época do ano foron frecuentes e, entre eles, destaca o do 9 ao 22 de febreiro. Non entanto, a temperatura máis alta durante o inverno mediuse o 15 de decembro na Palma/aeroporto, con 28,8 ºC. Na Península, Murcia alcanzou 28,1 ºC o 27 de xaneiro. Por outra banda, o organismo estatal explica que o último inverno foi no seu conxunto seco, cun valor de precipitación media sobre España peninsular de 145,9 litros por metro cadrado (l/m2), valor que representa o 77 % do habitual do trimestre no período de referencia 1991-2020. En total, tratouse do décimo sexto inverno máis seco desde o comezo da serie en 1961 e o sétimo do século XXI.

INVERNO HÚMIDO NO OESTE E SECO NO LESTE E AS ILLAS

En calquera caso, AEMET detalla que o inverno foi entre normal e húmido na metade oeste da Península, con excepción de puntos de Asturias, de Cantabria e de País Vasco, onde mostrou carácter seco. Pola contra, foi seco ou moi seco na metade oriental peninsular e en ambos os arquipélagos. De feito, chegou a ser extremadamente seco en pequenas zonas do sur de Cataluña, sur de Aragón e do suroeste de Castela-A Mancha. Tal e como se recolle no seu informe, o inverno comezou cun decembro moi seco, que constituíu o segundo con menos choivas do século actual tras o de 2015.

En liñas xerais, xaneiro comezou tamén seco, pero a segunda quincena foi moi chuviosa e o mes terminou con carácter húmido en conxunto. Finalmente, febreiro foi un mes máis seco do normal, aínda que chuvioso en zonas da metade norte. Neste aspecto, o organismo estatal destaca que houbo predominio das borrascas atlánticas durante os períodos chuviosos. Mentres que zonas do oeste e noroeste peninsular rexistraron precipitacións entre o 125 e 150 % da media normal, en áreas do terzo oriental peninsular non se chegou nin ao 25 % do normal. O maior acumulado en 24 horas rexistrouse o 26 de xaneiro na Coruña/aeroporto, con 96,7 l/m2. Así mesmo, ao longo dese mes, rexistráronse 473 l/m2 en Santiago de Compostela/aeroporto.

PRIMAVERA: MÁIS CALOR NA COSTA E AS ILLAS

Mentres, o trimestre que vai de abril a xuño mostra unha alta probabilidade de que as temperaturas estean por enriba do normal en todo o país, especialmente en zonas costeiras da Península e nos arquipélagos, segundo a predición estacional da Axencia Estatal de Meteoroloxía (AEMET). Con todo, avisa de que non hai unha tendencia clara en canto ás precipitacións, polo que é tan probable que o trimestre sexa máis chuvioso do normal como que sexa máis seco en toda España.