Martinho deixa máis de 600 incidencias: persoas feridas, acidentes, tellados arrincados e problemas de luz

As incidencias provocadas pola borrasca Martinho alcanzan un total de 638 en Galicia, entre as que se inclúen persoas feridas, accidentes de tráficos, tellados levantados e clases suspendidas en dous institutos de Cerceda e Cangas. O temporal deixou durante a madrugada e esta mañá en Galicia refachos de vento de ata 166 quilómetros por hora na Veiga. O vento obrigou a que os trens circulen con limitación de velocidade.

egundo a información do 112 Galicia, a maioría destes incidentes (614) producíronse entre a medianoite e as 18,00 horas deste xoves, 20 de marzo. Por provincias, a máis castigada polas incidencias debido ao vento foi Pontevedra, onde, tal e como informou o subdelegado do Goberno, Abel Losada, rexistrouse unha madrugada "moi complicada", con numerosos accidentes de tráfico que se saldaron con polo menos dúas persoas feridas.

Os alumnos da Escola Infantil do Con en Moaña, e dos Institutos de Educación Secundaria de Rodeira e María Soliño de Cangas, todos na comarca do Morrazo, retomarán as clases o vindeiro luns tras suspenderse nas últimas horas debido aos danos rexistrados polo temporal neses centros, aínda que os estudantes de dous deles volverán á actividade noutros centros diferentes de forma provisional.

Segundo informou a Consellería de Educación, Ciencia, Universidades e FP, na provincia de Pontevedra estes foron os centros que resultaron con danos debido ás condicións meteorolóxicas adversas, o tres con desprendementos na cuberta.

A Unidade Técnica da Consellería está a traballar "desde o primeiro momento" con empresas para acometer os labores de reparación "canto antes", segundo indicaron fontes do departamento autonómico. Ademais, o director territorial da Consellería, César Pérez, reuniuse este xoves cos equipos directivos dos centros e coas autoridades locais; e este venres o conselleiro desprazarase á zona.

CAÍDA DE ÁRBORES EN ESTRADAS

Sobre as incidencias na provincia de Pontevedra, o subdelegado do Goberno explicou que a maioría se deberon á caída de árbores en estradas.Todo iso, apuntou Abel Losada, ocorreu tanto en vías secundarias como de alta capacidade, dificultando a circulación e provocando máis dunha vintena de incidentes. Os dous feridos rexistráronse en Cangas e en Tomiño, aínda que non revisten gravidade.

Así mesmo, varios sinais de tráfico resultaron danadas debido á virulencia do temporal 'Martinho', así como o tellado dunha nave de Domaio, en Moaña, que caeu sobre a estrada PO-551, sendo necesario cortar o tráfico. Ademais, en Pazos de Borbén o tellado da Casa Consistorial ha saída voando, o que, tal e como detallaron desde o Goberno local, provocou "importantes danos na zona".

Debido a este suceso, o Concello comunicou que non haberá atención ao público durante toda a xornada, co obxectivo de "garantir a seguridade de todos e todas". Do mesmo xeito, pediu aos veciños que non se acheguen ao edificio, xa que existe risco de caída de cascotes. Neste contexto, Abel Losada pediu "precaución" e manter a "máxima atención" na estrada. Tamén solicitou ás empresas de transporte que "extremen a prudencia".

En Vigo, a Policía Local contabilizou 66 incidencias polo temporal, entre elas, colectores desprazados que interrompían a circulación en diferentes rúas da cidade e ocasionaron danos en vehículos. Efectivos da policía viguesa tamén acudiron a incidencias relacionadas con uralitas ou paneis desprendidos en zonas como a Avenida da Beiramar, Avenida de Castrelos, Cesáreo González, Ceboleira, Avenida do Alcalde Portanet, Vilagarcía de Arousa, Avenida Europa, rúa de Salamanca, rúa Zamora e rúa de Salamanca, así como a caídas de ramas de árbores en diversas rúas da cidade olívica.

INCIDENCIAS NA CORUÑA

Seguido de Pontevedra, A Coruña foi a segunda provincia onde máis incidencias rexistrou o 112. A maioría, explicou a central de emerxencias, caída de árbores e outros elementos de mobiliario urbano, o que causou complicacións na circulación, especialmente á primeira hora da mañá. Tamén se notificou o desprendemento da cuberta da depuradora de Touro, en Ribeira. Así mesmo, na Coruña, unha persoa resultou ferida pola caída dunha uralita na rúa Cardeal Cisneros e en Santiago rexistrouse un accidente de tráfico provocado pola caída dunha árbore na estrada N-550, ao seu paso pola Enfesta. O choque dun turismo contra a árbore ocasionou unha colisión en cadea con tres vehículos implicados.

Neste sentido, o 112 Galicia destacou que algún vehículo de transporte público e escolar tivo problemas para avanzar na súa ruta. Ademais, a Consellería de Educación confirmou a suspensión das clases no Centro Público Integrado CPI O Cruzamento de Cerceda polo desprendemento de parte da cuberta.

COMISIÓN ESCOLAR DE ALERTAS

Nesta liña, a Comisión Escolar de Alertas decretou a suspensión de actividades no exterior dos centros educativos das zonas oeste e suroeste da provincia da Coruña en horario de mañá polo aviso deste fenómeno meteorolóxico adverso de nivel laranxa por vento, tal e como establece o novo protocolo para a coordinación de actuacións no ámbito educativo nos supostos de alerta meteorolóxica.

A decisión, segundo informou a Consellería, foi tomada polo ente técnico despois de reunirse á primeira hora deste xoves tras recibir notificación por parte da Aemet da elevación do nivel de alerta ás 08.01 horas. As zonas afectadas comprenden aos concellos de Camariñas, Carnota, Cee, Corcubión, Dumbría, Fisterra, Mazaricos, Muxía, Vimianzo, Zas, Boiro, Dodro, Lousame, Muros, Noia, Outes, Padrón, A Pobra do Caramiñal, Porto do Son, Rianxo, Ribeira e Rois.

CIRCULACIÓN FERROVIARIA

Doutra banda, o temporal provocou a caída dunha árbore sobre a catenaria da vía ferroviaria entre Canaval e San Estevo de Sil, o que interrompeu a circulación de trens entre Ourense e Monforte de Lemos. A circulación xa está restablecida no punto tras permanecer cortada durante a mañá deste xoves. Segundo informou Adif pasadas as 12.30 horas, a incidencia quedou liquidada unha vez que se retirou a árbore. En concreto, o tráfico ferroviario estivo interrompido entre Canaval e San Estevo de Sil, o que afectou a varios servizos que facían a ruta Ponferrada-Ourense, A Coruña-Ourense ou Vigo-Barcelona. Renfe habilitou un servizo por estrada para os pasaxeiros afectados. Ademais, o temporal que deixou durante a madrugada e esta mañá en Galicia refachos de ventos de ata 166 quilómetros por hora, obriga a que os trens circulen con limitación de velocidade.

ALERTA NO MAR NA CORUÑA POR VENTOS 

A influencia da borrasca Martinho mantense este venres sobre Galicia, polo que a Axencia Estatal de Meteoroloxía (Aemet) activou alerta no mar da provincia da Coruña por ventos de máis de 60 quilómetros por hora e ondas de 4 metros (entre as 6,00 e as 19,00 horas), así como por vento na Mariña lucense (de 9,00 a 20,00 horas).

Pola súa banda, Meteogalicia suma un aviso amarelo por acumulación de choivas superiores a 40 litros por metro cadrado durante 12 horas no interior de Pontevedra, así como no interior e montaña de Ourense.

Segundo a información de Meteogalicia, durante este venres espéranse ceos parcialmente cubertos e choivas xeneralizadas que serán máis persistentes e cuantiosas na metade sur, ocasionalmente en forma de neve nas cimas máis elevadas ao final do día. As temperaturas sufrirán un lixeiro descenso.

A borrasca Martinho porá este venres en aviso a máis da metade de España por choiva, ondas, e, sobre todo, vento, segundo a Aemet.

 

 

 

 

Ver esta publicación en Instagram

 

 

 

 

 

 

 

 

 

 

 

Una publicación compartida de Galicia Confidencial (@galicia_confidencial)