Desembarco galego en Lorient
150 artistas galegos participarán no maior festival céltico do mundo, que se celebrará do 5 ao 14 de agosto.
Por GC Tendencias | Lorient | 22/07/2016 | Actualizada ás 12:28
A cutura celta volve citarse no Festival Interceltique de Lorient, Francia, onde durante dez días pasarán por esta vila bretona máis de 4.500 artistas para participar nos máis de 120 espectáculos que se desenvolverán nos distintos espazos do festival, chegando a haber 100.000 espectadores de pago e 700.000 visitantes. Galicia estará representada por arredor de 150 artistas do noso país.
No eido da música folk serán os membros de Riobó os primeiros en amosar a súa proposta, coa que están colleitando éxitos en cada concerto; estarán tamén Vaamonde, Lamas & Romero, amosando o seu estilo inconfundible.
Na parte máis tradicional os composteláns Brincadeira amosarán o mellor do baile e as banda de gaitas Cántigas e Frores (Lugo) e Malante (Malpica), o mellor da nosa música.
O dúo A Vagaba estará no ciclo de músicas sacras, e participarán no concurso MacCrimmon os gaiteiros Xesús Rodríguez, Daniel Fernández, Víctor Antelo e Jorge Gándara. E haberá ademais master‐class de baile tradicional.
Estes son algúns dos actos programados para os representantes de Galicia neste xa mítico festival intercéltico, que se celebrará do 5 ao 14 de agosto.
