Ourense nega un enchufe dunha filla dunha ex-concelleira
Ourense en Común (OuC) denunciou o enchufe nunha praza de educadora no Concello de Ourense. “A escollida para o posto ten relación directa co Partido Popular, sendo filla dunha persoa que concorreu nunha lista electoral dese partido dun concello próximo a Ourense”, acusa a marea ourensá.
Por Manuel Vilas | Ourense | 07/03/2017 | Actualizada ás 08:00
Segundo fontes municipais consultadas por GC, a presunta enchufada é filla de María Carmen Mouttet Álvarez, quen foi elixida concelleira do PP en Piñor tras concorrer polas listas do Partido Popular.
OuC describe varias irregularidades no proceso selectivo. A principal é que a praza foi convocada "dunha semana para outra sen ser publicada en ningún diario nin sequera na web municipal, e cun prazo de só tres días hábiles para participar”.
Que responde o Concello de Ourense a estas acusacións? “A convocatoria realizouse con publicidade e de feito estivo exposta no taboleiro de anuncios do Concello, como é práctica habitual en todos os procesos selectivos desta natureza”, aseguran voceiros oficiais do municipio tras seren consultados por GC. Sobrea pregunta de que a seleccionada ten vínculos de primeiro grao cunha concelleira conservadora, non hai ningún comentario por parte da Administración que lidera Jesus Vázquez (PP) . Por outra banda as bases da convocatoria din que se publicarán os requerimentos na web da Administración, pero OuC di que isto nunca se cumpriu e o Concello non indicou nada a GC ao respecto.
O certo é que o Concello tramitou tan rápido a selección que só concorreu unha candidata, a finalmente seleccionada. Isto malia ofertáranse inicialmente dúas prazas nunha provincia, Ourense, que presenta unha das maiores taxas de paro entre os mozos de todo o continente.
Ao quedar deserta unha das prazas, o municipio dividiuna en dúas noutra convocatoria, pero neste caso a través do Servizo Público de Emprego, para unha contratación laboral-temporal.
A outra praza, a adxudicada directamente polo Concello mediante o procedemento de urxencia, é de interinidade.
As educadoras traballarán na Concellería de Benestar Social gracias a unha subvención da Xunta. En opinión de OeC o Concello actuou deste xeito coa vacante non cuberta para poder xustificar a subvención a tempo pois “en lugar de contratar a unha educadora máis por dous meses, contratarán a dúas educadoras por un mes cada unha”. A marea da Cidade das Burgas presentou un recurso de reposición ao fío deste asunto.
