O socialista Paco Reyes non se presentará á Alcaldía de Santiago nas eleccións de 2019

O portavoz do PSOE no Concello de Santiago, Paco Reyes, anunciou este luns que non repetirá como candidato do Partido Socialista á Alcaldía nas próximas eleccións municipais de maio de 2019. Paco Reyes deu a coñecer a súa decisión nunha rolda de prensa ofrecida este luns, na que explicou que xa lle comunicara ao responsable do partido e aos compañeiros de grupo esta decisión que deu a coñecer publicamente coincidindo co inicio do curso político. Deste xeito, explicou que maio de 2019 será a "data de caducidade" do seu compromiso coa política municipal e que, a partir de entón, seguirá traballando no proxecto socialista desde a súa militancia, pero neste caso desde a base.

Na súa intervención, tamén lamentou non obter un mellor resultado nos comicios de 2015, nos que o PSOE só se fixo con catro edís. Con todo, na actualidade só tres edís exercen o seu cargo, tendo en conta que despois da renuncia de María José Tobar en maio de 2016, o número cinco da lista, Antón Barba, non tomou posesión nin renunciou á súa acta --o que levou ao PSOE a expulsalo--. Ademais, Paco Reyes comprometeuse a seguir traballando para que a persona que sexa candidata alcance a Alcaldía e mostrou o seu agradecemento aos seus compañeiros, os edís Mila Castro e Gonzalo Muíños.

POSIBLES CANDIDATOS

O Partido Socialista prevé elixir os seus candidatos nas cidades neste outono. Precisamente, para competir no proceso interno que finalizará coa elección do candidato socialista á Alcaldía da capital galega xa se postulou o decano da Facultade de Dereito da USC, Gumersindo Guinarte.

Pero, ademais de Guinarte, que deu a coñecer a súa decisión o pasado mes de maio, entre os socialistas composteláns barállase a posibilidade de que o que fose alcalde da cidade durante tres lexislaturas, Xosé Antonio Sánchez Bugallo, se postule. Con todo, está por ver se aceptaría competir nun proceso interno se non é ratificado como candidato por consenso.