PSA-Vigo quere aumentar o seu ritmo de produción en Vigo

A factoría de PSA Peugeot Citroën en Vigo estima que producirá ao redor de 410.000 vehículos este ano, o que supón unha cifra "un pouco menor" á de 2017, ao ser este un ano de transición e de lanzamento de novos modelos do K9. No entanto, entre 2020 e 2021, co K9 e o V20, prevé alcanzar a súa "capacidade récord de produción" e ter que aumentar as quendas e o persoal.

Así o trasladou o director da planta viguesa de PSA Peugeot Citroën e director do Polo Industrial Ibérico, Frédéric Puech, nunha rolda de prensa este martes con motivo do 60 aniversario da factoría viguesa, na que comentou que Vigo é a planta máis importante das tres que ten o Polo Ibérico.

Segundo explicou, a K9 arrincou este ano a súa produción con tres vehículos cada hora, e a finais de xuño chegaron a 35, tras o que o seu obxectivo é alcanzar a final deste ano unha cadencia de 44 coches cada hora. Así, indicou que a fábrica esta facendo 800 coches do K9 ao día e a súa "ambición é facer máis de 1.100 coches a fin de ano".

No relativo á cadencia total, Puech indicou que na actualidade a fábrica esta facendo 1.800 coches ao día, aínda que lembrou que o seu récord foi o pasado ano, cando se chegaron a facer 2.300 coches ao día e no conxunto do ano construíronse 547.000 vehículos en total.

NOVOS MODELOS

En canto á data do lanzamento da K9, explicou que cada país ten a súa propia previsión, aínda que avanzou que sairá en Francia e España neste mes, e a produción de vehículos lixeiros arrincará proximamente. Con todo iso, asegurou que "desde este fin de ano en toda Europa --poderase-- comprar unha K9 particular ou comercial".

No referente á produción, adiantou que a previsión é que coa marca Opel farán máis cantidade que os que se fan actualmente coa B9; e sobre a K9 eléctrica, comentou que teñen capacidade de facer entre 3.000 e 4.000 en 2019, e a partir de aí observarán como evoluciona a súa comercialización.

Respecto do modelo V20, ratificou que será da marca Peugeot e que non está previsto compartilo; ademais, o seu mercado de destino será Europa. Así mesmo, adiantou que a V20 tamén terá unha versión eléctrica, como tamén a teñen a K9 e a B9.

Do Citroën C-Elysée referendou que se fai en Vigo e "polo momento non está previsto que se faga en Kenitra", na planta de PSA en Marrocos, xa que alí teñen base EMP e os modelos M3 e M4 fanse na base antiga.

GASOLINA OU DIÉSEL

Noutra orde de asuntos, en resposta aos xornalistas, Puech apuntou que a porcentaxe de produción de PSA de vehículos diésel ou gasolina depende dos propios clientes, pero en todo caso mantivo que o grupo está preparado para "ter a resposta e capacidade" para atender á demanda que haxa.

Doutra banda, en canto á norma europea de emisión Euro 6.2 remarcou que o grupo e as súas cinco marcas teñen toda a súa gama adaptada a dita normativa porque fixeron "a transformación con tempo suficiente, e todos os motores son Euro 6.2.".

Finalmente, cuestionado por se valoran facer motores que admitan gas natural licuado ou gas natural comprimido, explicou que PSA ten capacidade de transformar os vehículos, pero de momento aposta por motores diésel, gasolina, híbridos e eléctricos. "Temos todas as respostas que necesita o mercado e a posibilidade de facer transformacións", selou.

60 ANIVERSARIO

Puech fixo un repaso á traxectoria da factoría de Vigo nos últimos 60 anos, desde que en 1958 abriu as súas portas para construír as furgonetas AZU e até a actualidade, que pasa polo modelo K9 e o próximo V20.

Así, puxo en valor as transformacións implementadas nos últimos anos para adaptar a planta á Fábrica 4.0., entre elas as liñas de prensado con almacenamento automático, o control de calidade xeométrico sen contacto, a automatización de procesos, a reorganización e o despregamento do 'Full kitting', que se incluirá "a final de ano para acoller a V20".

Todo iso, destacou Puech, foi acompañado dun amplo investimento (reforzado para o lanzamento dos novos modelos K9 e V20), así como de formación, con 114.000 horas impartidas en 2017 e 115.000 no que vai deste ano ante o lanzamento da K9.