Falece un septuaxenario na Pontenova tras envorcar o seu tractor

Un home de 76 anos faleceu na mañá deste xoves no lugar de Vilaboa, municipio lucense da Pontenova, tras envorcar o tractor que estaba a manexar. 

Segundo a información do Centro Integrado de Atención a Emerxencias 112-Galicia, o suceso ocorreu ás 11,00 horas nunha leira privada, onde o home manexaba o tractor.

Unha vez cargado, e nunha manobra, o vehículo envorcou, deixando ao home atrapado debaixo. De feito, foi necesaria a intervención de equipos de excarceración para liberar á vítima.

Até a zona desprazáronse unha dotación do GES da Pontenova, os Bombeiros de Barreiros e persoal sanitario de urxencia, que só puido confirmar a morte do home.