Ciudadanos di que a transferencia da AP-9 agocha intereses "electoralistas"
O partido laranxa foi o único que se opuxo ao traspaso de competencias sobre esta infraestrutura á Comunidade. A voceira autonómica, Olga Louzao, considera que esta autoestrada é "estratéxica para o conxunto do Estado" e asegura que a súa transferencia "non vai facer que se eliminen as peaxes".
Por Europa Press / Redacción | SANTIAGO DE COMPOSTELA | 12/12/2018 | Actualizada ás 13:31
Ciudadanos asegurou que a autoestrada AP-9 é, ademais de para Galicia, "estratéxica para o conxunto do Estado" e considerou que o debate sobre a transferencia da infraestrutura á Comunidade, admitido a trámite este martes, ten un transfondo "electoralista".
A portavoz autonómica da formación laranxa, Olga Louzao, reivindicou así o valor da AP-9 como vía de comunicación "estratéxica para Galicia", para "o conxunto do Estado" e "para a interconexión europea". "Polo tanto, calquera decisión en relación a esta infraestrutura non se debe tomar á lixeira nin movido por intereses electorais ou para captar votos", indicou.
Neste sentido, instou, antes de tomar calquera decisión, a "estudar os pros e os contras da transferencia" e a "non enganar á xente". "O feito de que a AP-9 pase a ser competencia da Xunta non vai facer que se eliminen as peaxes", indicou a portavoz galega de Ciudadanos, para quen "o verdadeiro problema" da infraestrutura é "o elevado custo para os usuarios e a ampliación da concesión por parte dos partidos que hoxe están a apoiar esta transferencia como unha maneira de blanquear as súas responsabilidades neste asunto".
"Onde está a coherencia do partido socialista, que cargou sobre o peto dos galegos a ampliación da ponte de Rande e que agora se queixa do caras que son as peaxes que el mesmo puxo? Ou do PP, que cando gobernaba en Madrid se negaba categoricamente á transferencia e agora que non goberna a reclama?", interpelou Louzao. Garantiu que Ciudadanos "non vai entrar na estratexia de utilizar a AP-9 como reclamo electoral".
Para a formación laranxa, as infraestruturas "non poden ser moeda de cambio política e deben basearse en criterios de obxectividade e eficacia". Por iso, durante o proceso de tramitación e debate desta proposición de lei, "haberá que pór sobre a mesa os beneficios e inconvenientes da transferencia da AP-9 a Galicia" e "haberá que tomar a mellor decisión en función de conclusións e informes obxectivos e non en posturas populistas", finalizou.
