Feijóo vende un PP "fiable" para a xente do mar fronte aos que "non" teñen "experiencia nin proxecto"

O presidente dos populares galegos, Alberto Núñez Feijóo, reivindicou ao PP como un partido "fiable" para os traballadores do sector do mar, fronte aos que "non teñen experiencia nin proxecto" e que queren "facer política coa pesca", con "contos" pero sen "contas".

Nun acto do Partido Popular celebrado en Teo, coa presenza da exministra Isabel García Tejerina e ante traballadores do sector pesqueiro de Galicia, Feijóo estivo precedido pola conselleira do Mar, Rosa Quintana, que criticou a falta de "criterio" do Goberno para reformar as cotas de pesca da caballa.

"Hai algúns que queren repartir cotas de pesca sen criterio, sen argumentos, pondo a uns sobre outros", asegurou Rosa Quintana, para quen "non se pode tomar con liviandade , hai que sentar e falar, non vale coller o coche desde Madrid e marchar a Asturias para dicir que vos vou a abrir os criterios de novo, e o resto de comunidades, que?".

Ante a posibilidade de que se reformen os criterios de repartición de cota, remarcou que en Galicia xa se está "traballando", con reunións coas Confrarías, para expor en Madrid os "criterios de reparticións". "Nós non facemos política coa pesca, hai quen o fai sen escrúpulo ningún", agregou.

Na mesma liña, tamén se pronunciou Feijóo que advertiu que nas próximas eleccións hai que decidir "quen goberna" no actual "temporal" político e avogando por "gobernos fiables" do mesmo xeito que no mar se aposta por "barcos fiables", patróns que coñecen o rumbo e tripulacións coordinadas.

"Como se pode ir a unha mesa de negociación só con contos, como sentar con autoridades francesas ou británicas", sinalou, en referencia ás negociacións en Europa, "se non levamos argumentos serios ou informacións amplas".

Fronte aos partidos aos que non lles importa o mar e "só corren a Bruxelas cando hai problemas ou a denunciar "aos pescadores galegos" ou ás "industrias conserveiras", defendeu que o PP quere "facer política pesqueira e non política coa pesca", con "datos e datas".

Entre os próximos retos do sector, incidiu no Brexit, que afecta a "máis de 100 barcos" que faenan en augas británicas e nas Maldivas, pero tamén no necesario cambio xeracional, para o que se formularán peticións á Comisión Europea para que permita a construción de novos buques, así como coa posta en marcha de fórmulas para achegar a formación náutico-pesqueira.

"CONTAS E NON CONTOS"

Pero no acto, Feijóo, que asegurou que "isto non vai de contos" senón de "contas", fixo balance da xestión "popular" na Xunta de Galicia, con datos como o incremento dos ingresos do marisqueo, que alcanzou en 2018 máximos históricos e con 236 proxectos desenvolvidos polas Confrarías para recuperar zonas improductivas.

Na mesma liña, reivindicou o avance nun 38% da produción acuícola desde 2008 a 2017, o crecemento da do mexillón nun 33% desde 2008 ou o apoio a que os propietarios de bateas puxesen o "contador a cero" e se frease a "pretensión do bipartito" de sacar as concesións por concurso público.

Feijóo tirou de máis datos na súa intervención, como os 2.000 millóns en exportacións de produtos do mar ou o crecemento nun 60% dos tráficos en mercadorías en comparación con fai dez anos e o investimento de 186 millóns nos portos galegos nesta última década.

"IMOS DANDO LECCIÓNS POLO MUNDO DE COMO SE DEBE PESCAR"

Balance de resultados que tamén realizou, pero desde a óptica estatal, a exministra Isabel García Tejerina, que enxalzou que desde o ano 2011 ata o 2018 "as cousas melloraron". "Hoxe imos dando leccións polo mundo, se este goberno actual non o estraga, de como se debe pescar".

Na súa intervención censurou as actuais negociacións do Goberno con Europa, que "vende con moito ruído que as cotas crecen un 0,4%", e ironizou: "Se eu volvo de Bruxelas cun 0,4% péchome no meu despacho e non quero ver a ninguén".

Pero tamén dirixiu as súas críticas ao goberno socialista de Rodríguez Zapatero, ao que censurou "cousas tan sucias", "tan feas" como que asumisen "unha multa e deixasen a quen lle ía a suceder a peor parte para que desen a cara os populares ante a mala xestión dos socialistas".

E ante as próximas eleccións europeas, que se celebrarán o 26 de maio, instou a apoiar a eurodeputados populares, porque aínda que cren na "sustentabilidade" e son "tan responsables como os demais", "non antepoñen o medio ambiente ás persoas", posto que ambas as cousas son "absolutamente conciliables".