O histórico dirixente do BNG, Camilo Nogueira, nun mitin de En Marea
O ex eurodeputado nacionalista sumouse ao líder de En Marea para entoar, caravel en man, o himno da revolución portuguesa. Villares defendeu o goberno e os logros de Martiño Noriega na capital galega.
Por Europa Press / Redacción | Compostela | 25/04/2019 | Actualizada ás 22:43
Camilo Nogueira, histórico dirixente do BNG, acudiu este xoves ao mitin que En Marea celebrou en Santiago. Un acto que abriu Luis Villares, pero no que interviu Alba Nogueira, ex militante do Bloque, e que vai de número tres ao Congreso pola provincia da Coruña.
Villares iniciou a súa intervención no penúltimo mitin da campaña cantando o 'Grandola Vila Morena' de Zeca Afonso, canción símbolo da Revolución dos Caraveis que acabou coa ditadura de Salazar en Portugal e da que se cumpren este xoves 45 anos. O público que se achegou ao Centro Sociocultural do barrio das Fontiñas, ao redor dunhas 150 persoas, entre elas Camilo Nogueira, sumouse ao líder de En Marea para entoar caravel en man o himno da revolución portuguesa.
Villares enxalzou o modelo de Santiago, gobernado desde 2015 por Compostela Aberta, a pesar de que a marea municipalista liderada por Martiño Noriega aliñouse contra o sector que encabeza Villares e que non se posicionou con ningunha formación nestas eleccións tras a división do proxecto rupturista.
"A nosa cidade, Santiago. A Compostela aberta, que é a que queremos para todo o país. Un exemplo de fraternidade que queremos exportar nas eleccións xerais", aseverou o portavoz do partido instrumental. "En Marea é o seu goberno municipal (o de Santiago), un proxecto que reivindicamos como propio", dixo.
CAMILO NOGUEIRA, PRESENTE NO ACTO
Villares arroupou no acto aos candidatos de En Marea pola provincia da Coruña Ana Seijas, Mariló Candedo, Alba Nogueira e Adrián Divos. Este último foi o encargado de abrir o mitin, que se celebraba no seu barrio, As Fontiñas. "Hoxe xogo en casa", apuntou ao comezo da súa intervención, na que saudou aos seus amigos presentes no acto e lembrou a "os que hoxe non poden estar aquí porque tiveron que abandonar Galicia ante a falta de expectativas laborais".
A continuación, o maxistrado lucense tomou a palabra para reclamar o voto para En Marea, un proxecto en clave "galega" e "progresista", que pretende "levar os problemas de Galicia a Madrid"; á vez que alertou dun posible pacto entre PSOE e Cs. Así mesmo, reivindicou que apoiar a En Marea "garante unha investidura progresista". "Non imos facer como o PSOE e Podemos de esperar dous anos. O noso país non se merece á dereita nin un só día", engadiu en referencia á moción de censura contra Mariano Rajoy que tivo lugar en xuño de 2018, pasada a metade da última lexislatura.
ALBA NOGUEIRA
A candidata número tres de En Marea ao Congreso, Alba Nogueira, centrou a súa intervención en reclamar que Galicia debe cambiar de modelo produtivo. "Non podemos especializarnos no lixo, nas empresas máis contaminantes. Galicia non pode ter a triste marca de achegar o 12% das emisións do Estado", subliñou.
Ademais, enxalzou a candidatura de En Marea, composta, segundo a profesora de Dereito na USC, por "xente normal" aos que "non se lles vai a vida en ter un cargo público". "Porque para ningún de nós nosa primeira opción é ser deputados", engadiu Nogueira, exmilitante do BNG e filla de Camilo Nogueira.
CRÍTICAS A PSOE E PODEMOS
A continuación, criticou á "esquerda tacticista", en referencia a PSOE e Podemos, quen "se enredaron no seu xogo de butacas durante tres anos e non quixeron gobernar por puro tacticismo". Un mesmo "tacticismo" que, para Nogueira, existiu no PSOE e o BNG de Santiago, que rexeitaron sumarse a un equipo de goberno con Compostela Aberta, grupo maioritario na corporación santiaguesa no último mandato.
"Hai xente que vai de cabeza de lista ao Congreso nestas xerais que mandou correos electrónicos dicindo que non se podía apoiar a Compostela Aberta; por puro tacticismo", resaltou Alba Nogueira, nunha alusión velada á número un do BNG ao Congreso pola Coruña, Néstor Rego, tamén secretario xeral da UPG e ex concelleiro en Santiago.
