Votan os principais líderes políticos

Os líderes políticos galegos comezaron a súa cita coas urnas facendo un chamamento á participación e facelo con liberdade.

BNG

A portavoz nacional do BNG, Ana Pontón, animou a acudir a votar neste 28 de abril nun "momento excepcional" no que é "importante que a cidadanía se exprese" para que Galicia teña "voz propia e estea presente". Pontón foi a primeira dos líderes dos partidos galegos en acudir a votar. Hao heco ás 09,30 horas e a mesa electoral do CGAC en Santiago, acompañada do candidato ao Congreso pola Coruña, Néstor Rego, que pouco despois tamén exerceu o seu dereito ao voto no CSC de Figueiras, tamén en Santiago.

Ana Pontón transmitiu a súa "ilusión" ante unha xornada importante na que os galegos se xogan moito e na que ha ha animado a "todo o mundo a participar, a votar con liberdade, a estar nas urnas". "Este 28 de abril imos decidir o noso presente, o noso futuro e temos que ir votar pensando en que Galicia queremos vivir, se queremos ou non que este país teña voz propia, cal é o futuro que lle queremos deixar aos nosos fillos e como facemos nun momento excepcional no que creo que é importante que a cidadanía se exprese", asegurou tras exercer o seu dereito a voto.

PSdeG-PSOE

O secretario xeral do PSdeG, Gonzalo Caballero, apelou este domingo ao "sentido da responsabilidade" dos cidadáns ao facer "unha chamada á mobilización" para "decidir o país que queren". "Estamos nunha xornada histórica de votación", asegurou o líder dos socialistas galegos ao acudir a votar en Vigo nunha xornada da que destacou que "está a transcorrer con total normalidade en Galicia".

"Vivimos nunha democracia avanzada onde o dereito ao voto é unha posibilidade para todos os cidadáns. É tamén un deber cívico", sinalou Caballero para "facer unha chamada á mobilización para que a cidadanía acuda ás urnas a decidir o país que quere, o futuro que quere para que toda a cidadanía vote en liberdade e en conciencia". "En cada elección decidimos como vai ser o país no que imos vivir", lembrou.

Por tanto, Gonzalo Caballero valorou que "a xornada está a transcorrer en normalidade como é propio dunha democracia avanzada" e incidiu en que "millóns de cidadáns no mundo non teñen dereito ao voto para decidir que goberno queren". "Aquí temos a posibilidade de que a cidadanía decida o goberno do país, creo que temos todos un sentido de responsabilidade de acudir a votar", sostivo.

EN COMÚN-UNIDAS PODEMOS

Os candidatos de En Común-Unidas Podemos fixeron un chamamento á "mobilización masiva" nesta xornada electoral para acudir ás urnas porque "está en xogo a democracia". Así o asegurou na Coruña o seu candidato pola provincia, Antón Gómez-Reino, que exerceu o seu dereito a voto durante a mañá no Centro Cívico da Cidade Vella. "Esperamos unha votación masiva para defender a democracia nun contexto no que está en risco", sinalou, para concluír que "é un gran día para saír a votar".

Pola súa banda, a candidata ao Congreso pola provincia de Pontevedra, Yolanda Díaz, votou en Ferrol (A Coruña), acompañada do alcalde da cidade, Jorge Suárez, de Ferrol en Común. Tras realizar un "chamamento" a todo o mundo para que vaia a votar, instou en especial á "xente nova" a acudir ás urnas: "Un chamamento á xente nova, a que se mobilicen e sexan conscientes de que non son unhas eleccións máis e que vaian votar, se a xente nova mobilízase poden decidir o futuro do país".

EN MAREA

O portavoz de En Marea, Luís Villares, chamou a votar este domingo electoral nas eleccións xerais de 2019 porque o "futuro se constrúe sobre a ilusión e a esperanza". "Pretenderon dicirnos durante a campaña que o futuro se construía sobre o medo, pero o futuro constrúese sobre a ilusión e sobre a esperanza, a esperanza en que as cousas poidan cambiar", afirmou cando depositou o seu voto en Lugo. "Este é o momento de cambiar as cousas porque o noso voto é decisivo", abundou.

Neste sentido, Villares manifestou que en En Marea están "esperanzados en ampliar liberdades, en ampliar o estado de benestar, en defender mellor" os intereses de Galicia. "Porque temos dereito a ser felices na nosa terra", destacou.

PP

O presidente da Xunta e do PPdeG, Alberto Núñez Feijóo, animou aos cidadáns a votar para ser "protagonistas" da "decisión colectiva" do futuro Goberno de España e a "actuar en consecuencia". Núñez Feijóo, que acudiu a votar ás 12,00 horas ao Colexio Neno Xesús de Praga en Vigo, remarcou que este domingo é "unha xornada importantísima para decidir o Goberno de España o vindeiro luns", ante o que lembrou que "os verdadeiros protagonistas do que vai suceder no Goberno de España" son todos os españois.

"Os españois temos que pensar quen queremos que nos goberne e actuar en consecuencia", sinalou Feijóo, quen instou a "actuar en consecuencia" conforme á opción que se elixa porque "a partir de mañá isto non se vai repetir, ou tradicionalmente isto non se repetía, en catro anos".

CIUDADANOS

A candidata de Cs ao Congreso pola Coruña, Marta Rivera, animou aos cidadáns a votar e espera que haxa unha alta participación. "Que voten, que sexan conscientes que hoxe é un día importante para A Coruña, Galicia e España", afirmou. Pola súa banda, a candidata de Cs ao Congreso por Pontevedra, Beatriz Piñeiro, acudiu este domingo ao colexio electoral da Casa das Artes, en Vigo, acompañada polo número dous da formación laranxa, Javier Alonso