Produtores insisten á Xunta que dea "solucións urxentes" aos danos causados pola fauna salvaxe

Agricultores e gandeiros --convocados polo Sindicato Labrego, Fruga, Aperfasa e Ovica-- protagonizaron este mércores unha cacerolada ante a Xunta e unha marcha polas rúas de Santiago para lanzar "un SOS" co fin de que o Goberno galego achegar solucións "urxentes" polos danos da fauna salvaxe.

A secretaria xeral do Sindicato Labrego Isabel Vilalba, denunciou o "deixamento de funcións" da Xunta ante un "problema de primeira orde" que "vai a máis en moitas comarcas galegas" en relación cos ataques do xabaril e o lobo. "No canto de solucionarse cada vez é peor", lamenta.

Deste xeito, reclámase que a Administración galega asuma a responsabilidade civil sobre a totalidade dos danos da fauna (perdas tanto directas como indirectas a valor de mercado), con pagos inmediatos. Vilalba censura que entre 2016 e 2019 "non convocaron unha soa axuda" por danos do xabaril, mentres houbo "atrasos de tres anos" nas do lobo.

Así mesmo, critica que se determine un máximo por axuda "independentemente de que os danos sexan moi superiores". Lembra que na lei de caza de 2013 comprometeuse a creación dun fondo de corresponsabilidade que non se activou seis anos despois, polo que "se hai vontade política créase en semanas e dótase de forma suficiente".

MEDIDAS A "CURTO E LONGO PRAZO"

Esta protesta esixe medidas a "curto e longo prazo". A líder do Sindicato Labrego pide á Xunta que "asuma as súas responsabilidades" ante a "extinción da xente labrega". "Sentimos que nos están botando do rural e hai moita xente nova que quere ter futuro", alerta.

Así, urxen á creación de censos comarcalizados e actualizados das poboacións de xabaril e lobo, pois "só se basean na información que mandan os tecores". Isabel Vilalba expón a aparición de "superpoboacións" en determinadas zonas, que tamén inciden nunha "maior sinistralidade en estradas". Chaman a actuar contra o abandono, que leva a que a fauna apareza "cada vez máis preto de vivendas", cunha forestación maior, "mesmo ilegal, coa conivencia da Xunta".

Ademais, estas entidades requiren a posta en marcha dun programa de sanidade animal e suficientemente dotado para o tratamento de enfermidades da fauna silvestre. Xunto a isto, piden outras actuacións como o financiamento ao "cento por cento" de medidas como a compra de mallas electrificadas e cans gardiáns. Tamén se empraza a realizar un programa de alimentación de fauna silvestre a cargo da Administración galega.

CASOS EN SERRA DO XISTRAL

Pola súa banda,  o alcalde de Muras (Lugo), Manuel Requeijo, lamentou a "situación de indefensión" que viven as explotacións na Serra do Xistral, que "non reciben unha resposta por parte da Xunta". Requeijo explica que no seu día alcaldes da zona enviaron un documento á Xunta sobre a problemática polas desfeitas do xabaril en campos e os ataques do lobo ao gando , pero "non se tivo resposta". "Se imos apoiar ao rural é o momento de demostralo e entendemos que estamos abandonados", opina.

Por iso, o rexedor empraza á Xunta a que se teña en conta o "lucro cesante e o dano emerxente", mentres apela a que se faga un censo de lobos en O Xistral. E é que explica que os ataques aumentan en lugares "máis próximos a núcleos urbanos e rurais que antes non había".