Os Pixies anuncian novo disco, 'Beneath the Eyrie', que presentarán na Coruña

O gupo de culto de rock alternativo Pixies anuncia novo disco, 'Beneath the Eyrie', á venda o próximo 13 de setembro. E acompañando este anuncio, a banda estadounidense estrea o primeiro sinxelo, 'On Graveyard Hill', xa dispoñible en plataformas dixitais. A xira de outono pasará pola cidade da Coruña en outubro.

"Lendas de bruxas, colonizadores como Daniel Boone, inadaptados e outros moitos personaxes, encaixan e conviven nas rarezas inherentes que ofrecerán as novas composicións de Pixies", adianta o comunicado do grupo.

'Beneath the Eyrie' foi producido por Tom Dalgety, nomeado en varias ocasións aos premios Grammy polos seus traballos con 'Ghost, Royal Blood' ou cos propios Pixies por 'Head Carrier'. Foi gravado en Dreamland Recordings preto de Woodstock (New York) nunha antiga igrexa construída en 1896.

A banda habitualmente saía fóra do estudo para charlar, pasear ou relaxarse e nas ramas dunha árbore que había xunto ao estudo. Alí viron un gran niño de aguias e de aí xurdiu a inspiración para titular a este novo álbum, 'Beneath The Eyrie' (Debaixo do niño de aguias).

Doutra banda, durante a gravación do álbum Pixies decidiu gravar todo o proceso, dando así a oportunidade aos seus millóns de seguidores en todo o mundo de poder ver todo o que sucedeu durante a gravación deste novo álbum integrado por doce cancións.

Serán doce capítulos distribuídos a modo de Podcast titulados 'It's a Pixies Podcast' e nos que se poderá ver o ocorrido no estudo durante a gravación, anécdotas, tensións ou cambios nas cancións. Mesmo habilitaron un espazo -'vídeo booth'- onde os músicos falaron dos seus pensamentos e observacións segundo ía evolucionando a gravación.

Estes podcasts están producidos por Pixies, presentados e narrados polo xornalista do 'New York Times' Tony Fletcher e autor de libros sobre The Who, REM ou The Smiths. A súa estrea será o 27 de xuño e estará dispoñible en todo o mundo a través de Google, Apple, Spotify, Acast, Sticher e outras plataformas.

Pixies percorrerá Europa o próximo outono, con concertos en España en outubro nas cidades de Barcelona (Sant Jordi Club), Madrid (La Riviera) e A Coruña (Coliseum).