EU avoga por cambiar o nome do Grupo En Marea antes de setembro para falar xa da candidatura ás autonómicas
Eva Solla aposta por que o cambio de designación no Parlamento de Galicia "acompáñese dun proxecto de futuro".
Por Europa Press / Redacción | SANTIAGO DE COMPOSTELA | 30/07/2019 | Actualizada ás 12:38
A coordinadora nacional de Esquerda Unida (EU), Eva Solla, aposta por formalizar o cambio de nome do Grupo de En Marea no Parlamento de Galicia "nas próximas semanas" ou "de aquí a setembro", aproveitando que agosto é un mes "no que a actividade política descende".
Ademais, a tamén vicepresidenta segunda da Cámara galega quere que ese cambio de nomenclatura "se acompañe dun proxecto de futuro", concretamente nunha candidatura para as eleccións autonómicas do 2020.
A preguntas dos medios nunha rolda de prensa celebrada este martes na sede de EU en Santiago, Eva Solla non quixo dar "un prazo determinado" para levar a cabo o cambio do nome do Grupo de En Marea depois de que tanto o portavoz de En Marea partido, Luís Villares, como outros tres deputados afíns decidisen pasar ao Grupo Mixto despois dos desencontros que tiveron ao longo da lexislatura co resto de formacións da confluencia --Podemos, EU, Anova e outras mareas municipalistas--.
"Seguramente nas próximas semanas, ou de aquí a setembro, como xa se pronunciaban outros compañeiros, poderemos ter un nome que faga referencia á pluralidade" do espazo, asegurou Solla, quen con todo non deu pistas sobre cal podería ser esa nova designación do grupo nin se retomarán o proxecto Galicia en Común, xa operativo no Congreso.
Así mesmo, a coordinadora nacional de EU rexeitou que a constitución dunha candidatura común para os comicios galegos, previstos para outono do 2020, sexa "unha condición absolutamente férrea" do futuro do grupo no Parlamento, xa que o "importante" é que os deputados "continúen co seu traballo".
"MÁIS FLUIDEZ" Ao DEBATE DA CANDIDATURA
Preguntada sobre se teme que a eventual plataforma de confluencia de EU con Podemos e Anova non estea suficientemente preparada para esa cita electoral, Solla respondeu que ao ser "un grupo ou un colectivo de partidos" e "identidades", porse de acordo "leva máis tempo" que cando se presentan por separado. "É unha cuestión de lóxica", recalcou.
Así, expresou que "seguramente en setembro" este debate ao redor dunha candidatura conxunta "darase con máis fluidez" para expor unha "ofensiva contra a dereita" do PP na Xunta.
"Nos meses despois do verán estaremos cos cóbados encima da mesa todos os días para chegar a un acordo co que defender os intereses dos traballadores do noso país", avanzou, non sen antes suxerir que "a alternativa" a Feijóo "desde logo non vai vir da man do Partido Socialista".
