Común da Esquerda acusa á Xunta de utilizar Sogama como negocio multimillonario de Naturgy

A viceportavoz de Grupo Común da Esquerda Luca Chao asegurou que a nova lei galega de residuos que iniciará en breve a súa tramitación parlamentaria "perpetúa o desastre ambiental de Sogama".

Así se pronunciou a deputada en declaracións aos medios antes de participar xunto a outros membros do grupo nunha reunión con membros de diversas plataformas ambientais para a preparación de emendas ao texto lexislativo, que recibiu o visto e prace da Xunta en decembro.

"Esta é unha lei que se concibe para adaptar as directrices europeas en materia de xestión de residuos, que marcan para o 2020 obxectivos de reciclaxe do 50%, mentres que Sogama está a día de hoxe no 3%. É unha lei baleira de contido real e unha burla á cidadanía galega", aseverou Chao.

Común da Esquerda reclama un "cambio de modelo" na xestión de residuos de Galicia, xa que considera que o actual está "centralizado en mans persoais que transporta o 90 por cento, coas consecuentes emisións que isto provoca".

"Sogama ten un negocio multimillonario para Nartury, a quen lle sae moi a conta contaminar o que é de todos e todas", incidiu a deputada, que denunciou que o "modelo Sogama do PP está a encher o país de vertedoiros, enterrando millóns de toneladas de lixo en ocos de canteiras como fixeron en Miramontes (Santiago) ou como pretenden facer en Casalonga (Teo)".

Sogama