Rexeitan a recusación presentada pola Fiscalía contra a xuíza que instrúe a Operación Zamburiña
Trátase dun procedemento contra nove presuntos traficantes e catro policías da anterior brigada antidroga da Comisaría da Policía Nacional de Ourense.
Por E.P. | OURENSE | 06/02/2020 | Actualizada ás 17:25
A Audiencia Provincial de Ourense rexeitou o incidente de recusación presentado o pasado novembro polo Ministerio Fiscal contra a maxistrada que instrúe a Operación Zamburiña, un procedemento contra nove presuntos traficantes e catro policías da anterior brigada antidroga da Comisaría da Policía Nacional de Ourense.
O proceso aberto acusa os catro axentes de protexer, tolerar e facilitar información para que os presuntos traficantes se fixesen con grandes incautacións de substancias psicoactivas.
Despois de que se abrise esta causa, o pasado novembro, o Ministerio Fiscal interpuxo un incidente de recusación contra a xuíza de instrución, pero "todas as partes comparecentes presentaron os correspondentes escritos" nos que manifestaban a súa "oposición" á recusación para apartar a maxistrada do caso.
Igualmente, a Audiencia Provincial opúxose a esta medida xa que considera que para expor unha recusación é necesario "expresar concreta e claramente a causa legal e os motivos" nos que se fundamenta. Debe sosterse con "feitos e circunstancias concretas" que deixen un "rastro escrito".
Esta é unha condición que o órgano provincial non aprecia neste caso e, ademais, considera "que os intereses" da Fiscalía "están perfectamente garantidos" no que respecta a un "xuíz imparcial".
Por todo isto, rexeitouse o incidente de recusación, devólvese á recusada a causa e senténciase que contra esta resolución non será posible recorrer. Desta maneira, despois de meses de atraso, será posible iniciar a vista oral do xuízo.
En concreto, os 13 procesados na Operación Zamburiña enfróntanse a penas de prisión que suman case 100 anos de cárcere. A fiscal solicita sete anos e medio para o ex-xefe do departamento Antidroga; sete para un dos seus compañeiros e seis e tres meses para outra. O cuarto tería que pagar unha multa de 5.400 se o declaran culpable.
Para os traficantes o Ministerio Fiscal solicita penas de ata 13 de anos de cárcere por traficar con substancias psicoactivas.
