O TSXG confirma a condena á Xunta por discriminar a un traballador nunha oferta de emprego público

O Tribunal Superior de Xustiza de Galicia (TSXG) confirmou unha sentenza do Xulgado do Social número 2 de Vigo que condenou á Xunta a pagar 9.000 euros de indemnización a un traballador por vulnerar o seu dereito fundamental á igualdade na convocatoria da adscrición temporal dun posto. En concreto, no seu día o xulgado condenou ao Goberno galego a indemnizar a un traballador laboral indefinido non fixo da Consellería de Medio Rural o cal se postulou a un proceso de adscrición temporal para un posto de operador codificador de datos, do cal foi excluído.

Así, o home interpuxo a demanda, alegando discriminación na convocatoria para a adscrición temporal do devandito posto no distrito forestal de Lugo-Sarria. Segundo o criterio administrativo, foi excluído do proceso selectivo pola súa condición de indefinido non fixo, dando preferencia a un traballador fixo. Agora, o TSXG confirma a sentenza do Xulgado do Social número 2 de Vigo, considerando que non se xustifica a diferenza de trato entre traballadores fixos e indefinidos non fixos.

"Non constando xustificación obxectiva e razoable, con independencia de que os criterios interpretativos contidos na Instrución de 2021 e aclaratoria sexan previos á convocatoria, do trato diferenciado ao persoal laboral fixo e ao indefinido non fixo no acceso ás adscricións provisionais, sexan a postos vacantes con ou sen reserva, e non apreciando que a sentenza de instancia incorrese nas infraccións denunciadas, o recurso debe ser desestimado", recolle a sentenza. Por iso, desestimou o recurso interposto pola Xunta, confirmando a sentenza, que aínda pode ser recorrida polas partes.

Pola súa banda, a sindicado CSIF celebrou este fallo, cualificándoo nun comunicado de "novo éxito xudicial" dos servizos xurídicos. Para CSIF, a reiteración deste tipo de condenas á Xunta "evidencia que desde a Administración está a incorrerse nunha política de prácticas discriminatorias que non se axustan á legalidade e que non só son lesivas para os empregados públicos senón para todos os cidadáns, en tanto están a afectar ás arcas públicas, ao ter que asumir as indemnizacións correspondentes".

Sede TSXG | Fonte: E.P. - Arquivo