Principio de acordo entre Podemos e Anova para ir en coalición ás eleccións do 5A

Os cadros de Anova terían aceptado xa as condicións impostas desde Unidas Podemos para formalizar unha coalición electoral de cara ás eleccións galegas do 5 de abril. Unhas condicións que pasarían porque Antón Gómez-Reino sexa o candidato á Xunta e pola división de distintos postos de saída, dous dos cales serían para Podemos, outro para Anova e outro para EU.

Póñense fin así a varias semanas de tensións entre as direccións de Podemos e Anova, tras a decisión de Gómez-Reino de presentar a súa candidatura as listas de Podemos Galicia para liderar, despois, as da candidatura de confluencias. Unha decisión que deixou sen posibilidades de presentarse a Martiño Noriega, ex alcalde de Santiago 

O tamén responsable de relacións políticas de Anova foi moi duro o pasado domingo nunha entrevista na Ser acusando a Unidas Podemos de "preferir obter un peor resultado" nas urnas a chegar a un acordo con eles. "A unidade popular non só é o federalismo de Unidas Podemos, é tamén o soberanismo, tamén o municipalismo, todo o que deu razón de ser aos resultados que obtivemos", explicaba, rememorando os éxitos das mareas locais do 2015 e a segunda praza alcanzada pola xa rota plataforma En Marea.

Tras estas duras declaracións, o propio Noriega e Gómez-Reino estiveron mantendo intensas conversas desde o luns pasado, con chamadas e intercambio de impresións, e mesmo reunións físicas, case todos os días para tentar fechar un acordo que "satisfaga" a todas as partes.

LONGAS NEGOCIACIÓNS

E ese principio de acordo foise fechando xa o pasado mércores, ultimado este xoves e ratificado xa na tarde do xoves polas mareas afíns a Anova, Marea Atlántica e Compostela Aberta, e pola propia dirección de anova durante a mañá deste venres. A militancia de Podemos tamén ratificou a posibilidade de ir en coalición e que esta leve as siglas de Galicia en Común e a de Podemos. Así, a coalición levaría este nome --as siglas impostas por Unidas Podemos--, e que xa se utilizaron nas pasadas eleccións xerais, pero nas papeletas tamén figurarían as siglas dos tres partidos; Podemos, Esquerda Unida e Anova. 

Fontes da negociación consultadas por GC suliñan que xa hai un principio de acordo para o reparto nas listas que sería sobre 55% para Unidas Podemos e 45% para Anova e as súas mareas. Con todo, o importante deste reparto está nos postos de saída, e aí Podemos reservase ser cabeza de lista en dúas provincias --poderían ser A Coruña e Ourense--, Anova noutra --Lugo-- e EU, a cuarta, Pontevedra, que podería encabezar a líder de EU, Eva Solla.

Tamén hai problemas para encaixar os segundos postos desas listas, sobre todo, en Pontevedra e na Coruña. Podemos podería ceder o segundo posto da Coruña para Anova sempre e cando sexa unha muller, pero se reservaría entón o número tres nesa provincia e o segundo de Pontevedra.