As piscinas municipais de Ourense abrirán a semana do 29 de xuño con cita previa

O Concello de Ourense informou este venres de que as piscinas municipais abrirán na semana do 29 de xuño, cun aforamento do 75 por cento e cita previa.

O concelleiro de Deportes, Mario Guede, indicou que se trata de instalacións "públicas e gratuítas" e é necesario ir "con moita precaución e con total seguridade". Os usuarios deberán manter a distancia de seguridade e poderán acceder ás instalacións en dúas quendas para que os equipos de limpeza poidan desinfectar.

O Consello Municipal de Deportes traballará a próxima semana para acondicionar as piscinas e colocará paneis informativos no recinto. En calquera caso, apela á responsabilidade individual para evitar situacións de risco.