Os traballadores de Siemens Gamesa reivindican que a planta das Somozas "é competitiva"
Os operarios concentráronse ante o edificio administrativo da Xunta en Ferrol
Por E.P. | SANTIAGO DE COMPOSTELA | 14/01/2021 | Actualizada ás 13:51
O presidente do comité de empresa de Siemens Gamesa nas Somozas, Sergio López (UGT), rexeitou que esta planta non sexa competitiva, tal e como alega a compañía para o seu peche. "Se non é rendible e competitiva é porque non lles interesa", declarou o representante dos traballadores, que levaron as súas protestas ante a sede da Xunta en Ferrol nunha nova xornada de folga.
"Nas últimas reunións que mantivemos coa dirección, sempre alertamos de que a nosa planta estaba quedando obsoleta e pequena para o novo mercado de pas de maior tamaño", asegurou López, que lamentou que a compañía rexeitase "todas" as propostas formuladas desde as administracións para apoiar a ampliación da planta de Ferrolterra.
Ditas manifestacións realizounas o representante sindical ás portas do edificio administrativo da Xunta en Ferrol, a onde levaron na mañá deste xoves, 14 de xaneiro, as súas protestas os traballadores polo peche desta planta. Alí estiveron acompañados por operarios de Navantia na ría de Ferrol, tanto da empresa principal como das compañías auxiliares, que mostraron a súa solidariedade cos traballadores de Siemens Gamesa.
MESA DE NEGOCIACIÓN
López detallou que teñen previsto constituír coa empresa o vindeiro martes día 19 --será en Madrid, ao estar tamén afectada a planta de Conca-- a mesa de negociación do expediente de regulación de emprego (ERE) extintivo para os 215 traballadores da planta de Ferrolterra, a totalidade do persoal.
"A partir de aí fixar un calendario de negociación durante un mes", apuntou o representante sindical, que detallou que o "obxectivo pasa por manter a planta aberta, para que se invista nela e que se de traballo para esta comarca".
Unha das reclamacións dos traballadores desta multinacional é que "se recolla nos novos concursos para a instalación de novos parques eólicos, tanto en Galicia como a nivel estatal, que un dos condicionantes sexa que os seus compoñentes se fabriquen neste territorio", "Cónstanos que tanto a Xunta como o Goberno central están a traballar de xeito conxunto para tratar de que Siemens Gamesa reverta a decisión que tomou do peche da planta das Somozas", apostilou López.
